सिन्धुपाल्चोक : सेभेन ए साईड ओपन बुद्धपूर्णिमा कप २०८० फुटबल प्रतियोगिताको उपाधि न्यू नमोबुद्ध क्लब खाडिचौरले हात पारेको छ।
चौतारा फुटबल क्लबले आयोजना गरेको प्रतियोगिताको फाइनल खेलमा शनिबार न्यू नमोबुद्ध क्लबले चौताराको द फ्लाईङ वर्डस्लाई ३–१ गोलअन्तरले पराजित गर्दै उपाधि चुमेको हो। खेल समयभर दुवै टोलीले गोल गर्न नसकेपछि खेल पेनाल्टीमा परिणत भएको थियो।
सुरुमा पेनाल्टी गर्ने मौका पाएका द फ्लाईङ वर्डस्का भीमबहादुर गुरुङले पहिलो गोल गरे। त्यसपछिको पेनाल्टीमा द फ्लाईङ वर्डस्ले असफलता भोग्यो। न्यू नमोबुद्ध क्लबले भने ३ गोल गर्यो। क्लबका सुजन, सनिश र सुरेशले १–१ गोल गरी क्लबलाई विजयी गराए।
उपाधि जितेको न्यू नमोबुद्ध क्लबले नगद ३० हजार र उपविजेता द फ्लाईङ वर्डस्ले १५ हजार रुपैयाँसहित ट्रफी र मेडल प्राप्त गरेका छन्।
१८ टिम सहभागी खेल भएको विजेता र उपविजेताहरूलाई चौतारा साँगाचोकगढी नगरपालिकाका प्रमुख कृष्णप्रसाद सापकोटाले पुरस्कार प्रदान गरेका थिए।
प्रतिक्रिया दिनुहोस !
