बसन्त ऋतुको पहिलो सरगमाथा आरोहण सुरु, ३ नेपालीसहित ६ जना चुचुरोमा

सोलुखुम्बु : सर्वोच्च शिखर सगरमाथामा बसन्त ऋतुको पहिलो सफल आरोहण गरिएको छ । आज आइतबार बिहान पौने ९ बजे ३ विदेशी र ३ नेपाली गरी ६ जना आरोहीले सगरमाथा चुचुरोमा सफलतापूर्वक पाइला टेकेसँगै यो सिजनको आरोहण सुरु भएको हो ।

पहिलो आरोहण गर्नेमा पाकिस्तानी नागरिक माईली तानी, अमेरिकन महिला आरोही जेसिका र हंगेरियाका मटन टि सेर्स रहेका छन् । त्यस्तै पहिलो आरोहणबाटै नेपाली आरोही पासाङदावाले २६ औं पटक सगरमागा चढेर किर्तिमान राखेका छन् । खुम्बु पासाङल्हमु गाउँपालिका वडा नम्बर ४ पाङबोचे निवासि पासाङदावा शेर्पाले २६ औं पटक सगरमाथाको शिखर चुमेर नयाँ किर्तिमान राखेको सगरमाथा प्रदुषण नियन्त्रण समिति (एसपिसिसि) का अध्यक्ष लामाकाजी शेर्पाले बताए ।

त्यस्तै आज सफल आरोहण गर्नेमा खुम्बुपासाङल्हमु ५ थामेका पासाङतेम्बा शेर्पा र सोही गाउँका आङङिमा शेर्पा रहेका छन् । अहिले आधार शिविरभन्दा माथि सयौंको संख्यामा आरोही चुचुरोतर्फ लागेका छन् । हिजो दिउँसो मात्रै चुचुरोसम्म आईसफल डाक्टरहरुले डोरी टाग्ने काम सम्पन्न गरेका थिए । आरोहणको ७० बर्षे इतिहासमा पहिलो पटक सगरमाथामा धेरै आरोहीले आरोहण अनुमति लिएका छन् ।