काठमाडौं : मुलुककै जेठो वीर अस्पतालमा जँचाउन जाँदै हुनुहुन्छ भने तपाईंलाई अझै खुसीको कुरा छ । अब यहाँको सेवा पाउन १० बज्नु पर्दैन । ७ बजे नै टिकट काउन्टर खुल्छ, ८ बजेबाटै उपचार सेवा सुरु हुन्छ । आइतबार मात्र ३ हजार १ सय बिरामीले बिहान ८ बजेदेखि नै टिकट काटेका छन् । सोमबारदेखि बिहान ७ बजे नै टिकट काउन्टर खुल्ने बताउँछन् अस्पतालका निर्देशक डा. पौडेल । भन्छन्, ‘टिकट काट्नेदेखि जाँच र शल्यक्रिया सेवासमेत बिहानैदेखि सुरु गरिएको छ ।’
अनलाइनबाटै टिकट काट्न सकिने व्यवस्था गरे पनि सेवाग्राहीले उपयोग गर्न भने सकेनन् । दूरदराजका बिरामीले अनलाइनबाट टिकट काट्न नसकेपछि सेवा प्रवाहलाई बिहानैदेखि सुरु गरिएको डा. पौडेलले जानकारी दिए । ‘टिकटका लागि सेवाग्राहीहरू रातिबाटै लाइन लाग्न बाध्य भएको पायौं,’ निर्देशक डा. पौडेलले भने, ‘सेवालाई सहज बनाउन अनलाइनबाट टिकट काट्ने व्यवस्था गर्यौं । तर, उपचार गर्न आउनेहरू सूचनाप्रविधिमैत्री भएको पाइएन । बिरामीहरूको अनलाइन सेवामा पहुँच नभएपछि बिहानै टिकट वितरण सुुरु गरेका छौं ।’
साउन १ गतेदेखि बिरामीले बिहानै ७ बजेदेखि टिकट लिने व्यवस्था गरिएको हो । अपराह्न साढे २ बजेसम्म टिकट लिन पाइने छ । त्यस्तै स्वास्थ्यकर्मीले बिहान ९ बजेभन्दा अगावै जिम्मेवारी हस्तान्तरण गर्ने व्यवस्था गरिएको डा. पौडेलले जानकारी दिए । ‘स्वास्थ्यकर्मीले बिहानै जिम्मेवारी हस्तान्तरण गर्ने व्यवस्था मिलाइएको छ । बिहान ८ बजेदेखि ९ बजेसम्म जिम्मेवारी हस्तान्तरण र क्लिनिकल अडिट हुने छ,’ उनले भने ।
शल्यक्रिया सेवा पनि बिहान ८ बजेदेखि नै सुरु गर्ने/गराउने भन्दै डा. पौडेलले सबै विभाग, युनिट, शाखा र वार्डमा परिपत्र गरेका छन् । बहिरंग सेवा बिहान ९ बजेभन्दा अघि नै सुचारु हुने जनाइएको छ । वीर अस्पतालमा कार्यरत चिकित्सक, नर्सलगायतका स्वास्थ्यकर्मी र कर्मचारीका लागि ई–हाजिरी अनिवार्य गरिएको छ । ओपीडी सेवाका कर्मचारीहरूको हाजिरीका लागि बिहान सवा ८ बजे र अपराह्न पौने चारबजेको हाजिरीलाई मात्र मान्यता दिइने जनाइएको छ ।
प्रयोगशालाको सेवा पनि बिहान ७ बजेदेखि नै सुरु हुने छ । खाली पेटमा जाँच गर्नुपर्ने खालका बिरामीको सहजताका लागि बिहानैदेखि सेवा सुरु गरिएको छ । गत असार ८ गतेदेखि ७ सयवटा जनरल बेड अस्पतालमा निःशुल्क छ । यसअघि जनरल प्रतिबेड शुल्क दुई सय थियो ।
वीर अस्पतालमा सेवा प्रवाहलाई चुस्त बनाउन जनशक्ति पनि थपिँदैछ । अहिले ३ सय ३० जना चिकित्सकले सेवा दिइरहेका छन् । २ सय ४६ जना नर्सिङ जनशक्ति पनि थपिएको छ । नर्सिङ जनशक्ति थपिएसँगै शल्यक्रियाका लागि महिनौं कुर्नुपर्ने समस्या अन्त्य हुँदै जाने डा. पौडेलले बताए । शल्यक्रिया कक्षलाई विस्तार गरिने योजना छ । ‘शल्यक्रियाका लागि कुर्नुपर्ने समस्या कसरी घटाउने भन्नेमा केन्द्रित छौं,’ उनले भने, ‘बिरामीको चाप हरेक वर्ष दोब्बर संख्यामा बढेको छ । त्यसैले क्षमता बढाउन लागेको छौं ।’ शल्यक्रियाका लागि १२ वटा कक्ष रहेकोमा ६ वटा कक्ष थप गर्न लागिएको छ ।
टिकट काट्नेदेखि सबै सेवा बिहानैदेखि सुरु गरिएको छ। स्वास्थ्यकर्मीको जिम्मेवारी हस्तान्तरण पनि चाँडै मिलाइएको छ। बिहान ८ बजेदेखि नै क्लिनिकल अडिट हुन्छ।
- डा. सन्तोस पौडेल, निर्देशक, वीर अस्पताल
तीन वर्षअघि आईसीयू बेडलाई ११ वटा थियो । अहिले ५५ वटा छन् । केही महिनाभित्रै १८ वटा आईसीयू बेड थपिने डा. पौडेलले जानकारी दिए । त्यस्तै एचडीयू पनि २५ बेड थप गर्न लागिएको छ । इमर्जेन्सीतर्फ पनि ३४ वटा बेड रहेकोमा १२ वटा थप गर्न लागिएको छ । ‘बिरामीको अवस्थाअनुसार वर्गीकरण गरेर उपचार व्यवस्था गरेका छौं,’ डा. पौडेलले भने, ‘इमर्जेन्सीमा एउटै बेडमा दुई /तीन जना राखेर उपचार गर्नुपर्ने बाध्यता हटाउन बेड थप्दैछौं ।’
यहाँ जलनको उपचार सेवासमेत सुरु गरिँदै छ । डा. पौडेलका अनुसार, सुरुमा १० वटा बेडबाट उपचार सुरु गर्ने प्रक्रिया अघि बढाइएको छ । निकट भविष्यमा २५ बेड पुर्याउने योजना रहेको छ । गत फागुन ५ गतेदेखि निर्देशकको जिम्मेवारीमा रहेका डा. पौडेलले १ सय ३५ वर्ष पुरानो अस्पतालबाट प्रवाह हुने सेवाप्रवाहलाई चुस्त पार्न सुरु गरिएको बताए । ‘विस्तारित सेवा प्रवाहमा लैजाने योजनामा छौं,’ निर्देशक डा. पौडेलले भने, ‘बिहान ८ बजेदेखि साँझ ८ बजेसम्म सेवा प्रवाह गर्ने सोंच छ ।’
प्रतिक्रिया दिनुहोस !
