भैरहवा : पाल्पा-११ लाई हराउँदै कपिलवस्तु-११ रुपन्देहीको कोटिहवामा जारी २१ औं लिस्नु कपको फाइनलमा प्रवेश गरेको छ।
बुधबार कोटिहवास्थित पशुपति माविको मैदानमा सम्पन्न अन्तिम सेमिफाइनल खेलमा कपिलवस्तु-११ ले पाल्पा-११ लाई १-० गोल अन्तरले पराजित गर्दै फाइनलमा प्रवेश गरेको आयोजक लिस्नु युवा क्लबका अध्यक्ष तीर्थ मल्लले जानकारी दिए।
कपिलवस्तु-११ का लागि टिम क्याप्टेन सन्जु सेन ठकुरीले खेलको ७५ औं मिनेटमा किक प्रहारले एक गोल गरे। यही गोल टिमलाई सेमिफाइनल खेल विजयी बनाउनुका साथै लिस्नु कपको उपाधि नजिक पुर्याउन सफल भयो।
खेलमा दुवै टिमले थुप्रै अवसर खेर फाल्दा कपिलवस्तु-११ लाई अग्रतासँगै उपाधी नजिक पुग्न ७५ मिनेटसम्म पर्खनुपर्यो। जितसँगै फाइनलमा प्रवेश गरेको कपिलवस्तु-११ अब उपाधिका लागि शुक्रबार फर्साटिकर एफसिसँग प्रतिस्पर्धा गर्ने अध्यक्ष मल्लले बताए।
प्रतियोगितामा विजेताले तीन लाख, उपविजेताले एक लाख ५० हजार र सेमिफाइनलमा पुग्ने दुई टिमले २५/२५ हजार रुपैयाँ समेत पुरस्कार प्राप्त गर्ने आयोजकले जनाएको छ।
प्रतिक्रिया दिनुहोस !
