लक्ष्मीपूजामा बालेको मैनबत्तीबाट सल्केको आगोले घर जलेर नष्ट, ३० लाखको क्षति
कात्तिक २७, २०८० सोमबार १३:४६:१६
बैतडी : बैतडीमा लक्ष्मीपूजाका दिन बालिएको मैनबत्तीबाट सल्किएको आगोले घर जलेर नष्ट भएको छ । पुर्चौडी नगरपालिका–१ डाडाँकोटका जयानन्द जोशीको घरमा आइतबार राती साढे ९ बजेको समयमा मैनबत्तीबाट सल्किएको आगो विद्युतको तारसम्म पुगेको र विद्युतको तार सट भइ घरमा आगलागी भएको जिल्ला प्रहरी कार्यालय बैतडीका सूचना अधिकारी खेमविक्रम केसीले जानकारी दिए ।
घरमा रहेका दुईवटा ग्यास सिलिन्डर पड्किएपछि घरमा थप क्षति पुगेको उनले बताए । स्थानीय र प्रहरीको सहयोगमा करिब एक घण्टापछि आगो नियन्त्रणमा आएको थियो । जोशीको घर पूर्णरुपमा जलेको र सबै सरसमान जलेर नष्ट भएको छ ।
उक्त घरमा डेरा गरी बस्ने कर्मचारीको एकथान ल्यापटप समेत आगलागीमा परेर नष्ट भएको छ । यसैगरी आगलागीबाट दुई तोला सुन र ५० तोला चाँदी पनि नष्ट भएको छ । प्रहरीका अनुसार आगलागीबाट करिब ३० लाख रुपैयाँ बराबरको नोक्सानी पुगेको छ ।
प्रतिक्रिया दिनुहोस !
