देशका गोप्य सूचना विदेशीलाई बेच्ने एजेन्टलाई संसदबाट हटाऔं, मन्त्री होस् वा पार्टीको महामन्त्री : लामिछाने

काठमाडौं : उपप्रधान एवम् गृहमन्त्री रवि लामिछानेले कांग्रेसले सदनमा उठाएका प्रश्नको जवाफ दिएका छन्। आइतबार बेलुका प्रतिनिधि सभाको बैठकलाई सम्बोधन गर्दै गृहमन्त्री लामिछानेले कांग्रेसले पार्टी बैठक बसेर सांसद (आफू)लाई बोल्न दिने/नदिने निर्णय गरेको भन्दै आपत्ति जनाएका हुन्। 

उनले गोर्खा मिडियामा आफूले प्रवेश गर्दा `स्वीट शेयर´ मात्र लिएको र जाँदा छोडेर गएको स्पष्ट पारे। उनले आफ्नो नाम मुछिएका सहकारीमा आफू सहकारीको सदस्य नभएको र ऋणसमेत नलिएकोसमेत प्रष्ट पारे।

लामिछानेले यो देश अब तपाईंहरु (कांंग्रेस) को गनगनले मात्रै नचल्ने दाबी गरे। उनले अप्रमाणित हल्लाको पछाडि नलाग्न सबैलाई आग्रह गरे।

लामिछानेले सहकारी ठगी गर्नेलाई मात्र नभई , कृषि अनुदानको रकम हिनामिना गरेर कुखुरा, माछा, खसी बोका, बाख्रा पाल्नेमाथि पनि छानबिन गरेर संसद बाहिर पठाउनुपर्ने धारणा राखे।

‘दुई/तीन वटा नागरिकता बोक्नेलाई मात्र होइन, एउटै नागरिकता र पासपोर्ट बोक्ने, तर देशका गोप्य सूचना विदेशीलाई बेच्नेलाई एजेन्ट संसदबाट हटाऔं। त्यो देशको मन्त्री होस् वा पार्टीको महामन्त्री होस्।’ उनले भने,‘संसदलाई लड्ने र भिड्ने थलो नबनाऔं।’

रास्वपा सभापति लामिछानेले आफूले सहकारीको ऋण लिएको प्रमाण पेस गर्न चुनौती दिँदै सहकारी ठगीको विषयमा व्यक्ति केन्द्रित संंसदीय छानबिन समिति बनाउन नसकिने धारणा राखे।