सहकारी ठगी प्रकरण
सरकारी वकिलको कार्यालयमा पूर्वडीआईजी छविलाल जोशीको बयान जारी
असोज ८, २०८१ मंगलबार १२:२:५
काठमाडौं : सहकारी ठगी प्रकरणमा पक्राउ परेका छविलाल जोशीको बयान सुरू भएको छ। जिल्ला सरकारी वकिल कार्यालय कास्कीमा जोशीको बयान जारी छ। बयानका लागि जोशीलाई बिहान १० बजे सरकारी वकिल कार्यालय पुर्याएको थियो। अहिले बयान जारी रहेको जिल्ला प्रहरी कार्यालय कास्कीका प्रमुख एसपी मोहनकुमार थापाले जानकारी दिए।
जोसीलाई हिरासतमा राखेर अनुसन्धान गर्न जिल्ला अदालत कास्कीले पाँच दिनको म्याद दिएको छ।
सहकारी ठगी प्रकरणमा गोर्खा मिडिया नेटवर्क प्रालिका सञ्चालक जोशीलाई प्रहरीले आइतबार साँझ काठमाडौंबाट पक्राउ गरेको थियो। काठमाडौं महानगरपालिका–१ नक्साल निवासी जोशी सेवा निवृत्त नेपाल प्रहरीका प्रहरी नायव महानिरीक्षक (डीआईजी) समेत हुन्। उनको जन्मघर मालारानी–२ अर्घाखाँची हो।
सहकारी संस्था बचत रकम दुरुपयोग सम्बन्धमा गठित संसदीय छानबिन विशेष समितिले बुझाएको प्रतिवेदनमा जोशीलाई कानुनअनुसार कारबाहीका लागि सिफारिस गरेको थियो। समितिले जोशीसहित गोर्खा मिडिया नेटवर्कका अध्यक्ष गितेन्द्रबाबु (जीबी) राई, तत्कालीन प्रबन्ध निर्देशक रवि लामिछाने र सञ्चालक कुमार रम्तेललाई कारबाहीका लागि सिफारिस गरेको छ। समितिले प्रतिनिधिसभामा प्रतिवेदन बुझाएलगत्तै त्यसलाई सरकारसमक्ष पठाउन सभामुखले निर्देशन दिएका थिए।
उनीहरूले सुप्रिम, सूर्यदर्शन, सानोपाइला, सहारा र स्वर्णलक्ष्मी सहकारी बचत तथा ऋण सहकारी संस्थाबाट गोर्खा मिडियामा रकम लिएर ठगी गरेको समितिले ठहर गरेको छ। यी सहकारीबाट मिडिया नेटवर्कमा ६५ करोड रुपैयाँ प्रवाह भएको समितिका सभापति सूर्य थापाले बताएका छन्।
सञ्चालकको हैसियतले जोशीको पनि रकम अपचलनमा संलग्नता पुष्टि भएको समितिको ठहर छ। तर, जोशीले समितिको बैठकमा सहकारीमा आएको रकमबारे आफूलाई कुनै जानकारी नभएको प्रतिक्रिया दिएका थिए। समितिको अध्ययनले भने उनको दाबी पुष्टि गर्दैन।
सूर्यदर्शनलगायत सहकारीको बचत रकम अपचलन गरेको जाहेरीमा पूरक अनुसन्धान गर्न संसदीय छानबिन विशेष समितिको सिफारिसका आधारमा गृह मन्त्रालयले प्रहरी प्रधान कार्यालयलाई निर्देशन दिएको थियो। जोशीलाई पक्राउ पछि आइतबार नै जहाजमार्फत पोखरा लगिएको थियो।
सोही प्रकरणमा मुछिएका जीबी राईलाई प्रहरीले अझै पक्राउ गर्न सकेको छैन।
प्रतिक्रिया दिनुहोस !
