एमालेको जागरणसभा किन ?

काठमाडौं : सत्तासीन एमालेले मंसिर ७ मा राजनीतिक अस्थिरता र अराजकताका विरुद्ध जागरणसभा गर्दैछ । शुक्रबार पत्रकार सम्मेलन गरेर एमालेले आफू सत्तामा रहेको बेला जागरणसभा गर्नुको कारण स्पष्ट पारेको छ । एमालेले विधिको शासन र कानुनी राज्यका पक्षमा जनमत निर्माण गर्न यो जागरणसभा गर्न लागेको बताएको छ । 

एमालेले शुक्रबार पार्टी केन्द्रीय कार्यालय च्यासलमा पत्रकार सम्मेलन गरी आगामी मंसिर १६ गते हुने स्थानीय तहको उपनिर्वाचनमा पार्टीको पक्षमा जनमत तयार गर्ने उद्देश्यसमेत राखेर कार्यक्रम आयोजना गर्न लागिएको बताएको छ । मंसिर १६ गते स्थानीय तहका रिक्त ४४ स्थानमा उपचुनाव हुँदैछ । काठमाडौंंको कीर्तिपुर नगरपालिकाको प्रमुखदेखि काठमाडौंं महानगरपालिका– १६ वडाध्यक्षसहित ४४ ठाउँमा उपचुनाव हुन लागेको हो । एमाले अधिकांश स्थानको उम्मेवारी टुंग्याएर निर्वाचन होमिसकेको छ । 

एमाले काठमाडौंं, ललितपुर र भक्तपुर जिल्ला कमिटीहरू मुख्य आयोजक, विभिन्न जनसंगठन, पेसागत संगठन, सम्पर्क समन्वय कमिटी र विभागहरूको सहभागितामा मंसिर ७ गते काठमाडौंंमा जागरण सभा हुँदैछ । पत्रकार सम्मेलनमा पार्टी महासचिव शंकर पोखरेलले जनतालाई आशावादी बनाएर समाजमा देखिएको अराजकता चिर्न आवश्यक रहेको स्पष्ट पारे । जनता असन्तुष्ट छन् भनी गरिएको प्रचारलाई चिर्न जागरणसभा गर्न लागिएको उनले जानकारी दिए । 

‘जनता प्रमुख दलप्रति नै विश्वास र भरोसा गर्छन् र उनीहरूबाट नै सुधारको अपेक्षा गर्छन् भन्ने सन्देश दिन जरुरी छ, त्यो हिसाबले जागरण सभा गर्दैछौं’, उनले भने । उनले जनताको बीचमा जाने कुरा रक्षात्मक नहुने बताए । राजनीतिक दल सधैंंभरि जनताको बीचमा नै जानुपर्ने उनले स्पष्ट पारे । उनले जनताको बीचमा जाने एउटा माध्यम जागरणसभा भएको बताए । उनले सामाजिक अराजकता प्रवृत्तिकै रूपमा अघि बढेकोमा चिन्ता प्रकट गरेका छन् । सामाजिक अराजकता प्रवृत्ति विकास र समृद्धिका लागि बाधक हुने उनको भनाइ छ । 

सहकारी प्रकरणमा राष्ट्रिय स्वतन्त्र पार्टीका सभापति रवि लामिछाने माथि छानबिन प्रक्रिया अघि बढ्दा जस्तो प्रकारको गतिविधि भएको छ त्यो कानुनी राजको खिल्ली भएको उनको भनाइ छ । ‘निरन्तर रूपमा योजना बनाएर यस्तो गतिविधि गर्नु उचित कुरा होइन’, पोखरेलले भने । गौरवशाली इतिहास, सही र सक्षम नेतृत्व, क्रान्तिकारी विचार, अग्रगामी सोच र स्पष्ट गन्तव्यलाई प्रष्ट पार्न पनि मंसिर ७ मा सभा गर्न लागिएको स्पष्ट पारेको छ । वर्तमान संयुक्त सरकारले गरेका काम उपलब्धि र आगामी योजनाका बारेमा जनतालाई स्पष्ट गर्न यो सभा गर्न लागेको स्थायी समिति सदस्य एवं बागमती प्रदेश इन्चार्ज डा. राजन भट्टराईले बताए । 

सुशासन, विकास र समृद्धिका लागि राजनीतिक स्थायित्व कायम गर्न, संवैधानिक, कानुनी र संरचनागत सुधारको प्रक्रिया अघि बढाउन मंसिर ७ मा भृकुटीमण्डपमा एमाले जागरणसभा गर्न लागेको उनले बताए । एमालेले विधिको शासन र कानुनी राज्यका पक्षमा जनमत निर्माण गर्न यो जागरण सभा गर्न लागेको बताएको छ । 

प्रचार तथा प्रकाशन विभाग प्रमुख राजेन्द्र गौतमले राजनीतिक अस्थिरता र अराजकताका विरुद्ध, विधिको शासन र कानुनी राज्यका पक्षमा जनमत निर्माण गर्न जागरण सभा गर्न लागिएको बताए । उनले गौरवशाली इतिहास, सही र सक्षम नेतृत्व, क्रान्तिकारी विचार, अग्रगामी सोच र स्पष्ट गन्तव्यलाई प्रस्ट पार्न, वर्तमान संयुक्त सरकारले गरेका काम, उपलब्धि र आगामी योजनाका बारेमा जनतालाई स्पष्ट गर्न, सुशासन, विकास र समृद्धिका लागि राजनीतिक स्थायित्व कायम गर्न, संवैधानिक, कानुनी र संरचनागत सुधारको प्रक्रिया अघि बढाउन आगामी मंसिर १६ गते हुने स्थानीय तहको उपनिर्वाचनमा पार्टीका पक्षमा जनमत निर्माण गर्न सभा गर्न लागिएको पार्टी जानकारी दिए । 

‘आगामी मंसिर ७ गते प्रदर्शनीमार्ग, भृकुटीमण्डप जाऔं ! एमालेद्वारा आयोजित विशाल ¥याली र जागरण सभामा सहभागी बनौं,’ पत्रकार सम्मेलनपछि जारी विज्ञप्तिमा भनिएको छ, ‘देश र जनताको राष्ट्रिय स्वाभिमान, एमालेकै नेतृत्वमा समृद्धिको अभियानलाई सफल पार्न व्यापक जनपरिचालन गरौं र जनजागरण सभालाई सफल पारौं !’

कांग्रेस–एमालेप्रति नै विश्वास र भरोसा

एमालेका महासचिव पोखरेलले जनताले कांग्रेस–एमालेप्रति नै विश्वास र भरोसा गरेको दाबी गरे । उनले प्रमुख दलहरूप्रति जनता असन्तुष्ट छन् भन्ने कुरा गलत हो भन्ने सन्देश दिन पनि पार्टीले जागरण अभियान सञ्चालन गर्न लागेको बताए । उनले नेपाली जनताले प्रमुख दलहरूबाट नै मुलुकमा सुधारको अपेक्षा गरेको बताए । 

‘ललितपुर, भक्तपुर र काठमाडौंं जिल्ला कमिटीको अगुवाइमा जागरण अभियान कार्यक्रम हुँदैछ । उपत्यकामा नै आयोजना हुने कार्यक्रमका माध्यमबाट हामी यस्तो सन्देश दिन चाहन्छौं कि जनता असन्तुष्टि छन् भन्ने खालको कुरा जुन खडा गर्न खोजिएको छ ।’ 
उनले भने, ‘त्यो होइन, जनता प्रमुख दलहरूप्रति नै विश्वास र भरोसा गर्छन् । र, उनीहरूबाटै सुधारको अपेक्षा गर्छन भन्ने सन्देश दिनु पनि जरुरी छ । त्यो हिसाबले हामीले जुन सभाको आयोजना गर्न खोजेका छौं । जागरण सभा, त्यसको औचित्य त्यसले पुष्टि गर्छ ।’

‘संयन्त्रले सरकारको काममा हस्तक्षेप नगर्ने’
महासचिव पोखरेलले सरकारलाई काम गर्नका लागि उचित वातावरण बनाउनका लागि सत्तारूढ कांग्रेस–एमालेले संघ, प्रदेश र स्थानीय तहमा संयन्त्र बनाएको बताए । यो संयन्त्रले सरकारको काममाथि हस्तक्षेप नगर्ने पनि उनले प्रष्ट्याए ।

महासचिव पोखरेलले प्रधानमन्त्रीको आसन्न चीन भ्रमण महŒवपूर्ण र उपलब्धिमूलक हुने बताए । ‘नेपाल र चीनका बीचमा विगत लामो समयदेखि जुन प्रकारको उच्चस्तरको सम्बन्ध रहँदै आएको छ त्यसको निरन्तरता नै हुन्छ भन्ने मलाई लाग्दछ’, पोखरेलले भने, ‘त्यसैले यो भ्रमणलाई हामीले सद्भावना भ्रमणकै रूपमा बुझेका छौं । र, भ्रमण महत्तवपूर्ण र उपलब्धिमूलक हुन्छ भन्ने हाम्रो विश्वास हो ।’ प्रधानमन्त्री ओलीले अगामी डिसेम्बर २ देखि ६ सम्म चीन भ्रमण गर्ने कार्यक्रम रहेको छ ।

यसैबीच, महासचिव पोखरेलले एमाले जनताको रोजाइको पार्टी भएको दाबी गरेका छन् । पोखरेलले एमाले जनताको बीचमा लोकप्रिय भए पनि एक्लै देश सञ्चालन गर्न सक्ने अवस्थामा नरहेको बताए । ‘लोकप्रिय मतमा नेकपा एमाले नै अगाडि छ, तर सरकार बनाउन पुग्ने मत पुगेको छैन, सरकारको नेतृत्व गरिरहेका छौं, तर राष्ट्रको नेतृत्व गर्ने निर्णायक मत प्राप्त गरेका छैनौं’, पोखरेलले भने । 

उनले आउने चुनाव सबै दलले छुट्टाछुट्टै लड्ने निर्णय गरेको बताए । पोखरेलले यसको सबैभन्दा बढी लाभ एमालेले लिने दाबी गरे । अहिले कांग्रेससँग सहकार्य गरे पनि आउने चुनावमा एमाले कांग्रेस अलग्गै चुनाव लड्ने स्पष्ट पारे । ‘कांग्रेससँग सहकार्य र प्रतिस्पर्धा पनि सँगसँगै छ भन्ने सच्याइलाई बुझेर हामीले अगाडि बढ्नु पर्छ’, उनले भने । 

सरकार परिवर्तन हुन्छ भन्ने गलत हल्ला फैलाइएको कारण जति हुनुपर्ने त्यति काम हुन नसकेको पोखरेलले बताए । ‘एमाले र कांग्रेस बीच सरकारलाई निरन्तरता दिने विषयमा गहिरो समझदारी छ, यद्यपि सरकार परिवर्तन गर्न चाहनेहरूको प्रयास जारी छ’, उनले भने । 

उनले समाजमा फैलँदै गएको सामाजिक अराजकता ठूलो चुनौतीका रूपमा रहेको बताए । त्यो सामाजिक अराजकता चिर्न नसक्ने हो भने मुलुकको समृद्धि अघि बढ्न नसक्ने पोखरेलको भनाइ छ । समाजमा आशा जागृत गर्ने गरी संगठित शक्ति नलाग्ने हो भने निराशा चिर्न नसक्ने पोखरेलले धारणा राखे । उनले नेपालका संस्कृति मूल्य मान्यतालाई विघटन गर्ने पनि सुनियोजित प्रयास भइरहेको बताए ।

विभिन्न खालका अतिवाद माथि वैचारिक रूपमा विजय प्राप्त गर्न आवश्यक रहेकोमा पोखरेलले स्पष्ट पारे । उनले आजको आर्थिक संकटका समाधानको सामथ्र्य नेकपा एमालेसँग मात्रै रहेको पनि दाबी गरे ।