झापा : विर्तामोडको एक ग्यारेजमा आगलागी भएको छ। आगलागीबाट ग्यारेजमा मर्मत सम्भारका लागि राखिएका तीन वटा बसमा क्षति पुगेको जिल्ला प्रहरी कार्यालय झापाले जनाएको छ।
आज बिहान साढे १० बजे विर्तामोड–५ स्थित पश्चिम बस स्टेसनजिक रहेको ग्यारेजमा निदि क्याम्पसको मे १ ख ३३४५ नम्बरको बसमा मर्मत गर्ने क्रममा अचानक विद्युत् सर्ट भइ आगलागी भएको थियो। आगलागीबाट क्याम्पसको बस पूर्ण रूपमा जलेर नष्ट भएको छ।
त्यस्तै सोही ग्यारेजमा बनाउन ल्याएको मे १ ख२२१५ नम्बरको मातृ भाग्य रेखा बसको अगाडीको भाग र प्र १–०१–००१ख ४१२६ नम्बरको बसको पेन्टिङ जलेर क्षति पुगेको प्रहरीले जनाएको छ। तीन वटा गाडी जल्दा अन्दाजी २१ लाख बराबरको क्षति भएको छ। बसमा लागेको आगो विर्तामोड नगरपालिकाको दमकल, नेपाल प्रहरी र स्थानीयवासीको सहयोगमा नियन्त्रणमा लिइएको थियो।
प्रतिक्रिया दिनुहोस !
