वीरगन्ज : वीरगन्जको ठाकुरराम बहुमुखी क्याम्पसमा स्थगित स्ववियु निर्वाचनको मतगणना बुधबार दिउँसो १ बजेदेखि सुचारू हुने भएको छ। मंगलबार साँझ जिल्ला प्रशासन कार्यालय पर्सामा जिल्ला सुरक्षा समितिको आयोजनामा बसेको विद्यार्थी संगठनका नेता र उम्मेदवारसहितको बैठकले मतगणना बुधबार दिउँसो १ बजेदेखि सुचारू गर्ने निर्णय गरेको प्रमुख जिल्ला अधिकारी गणेश अर्यालले जानकारी दिए।
मंगलबारको बैठकले अवरुद्ध मतगणना बुधबार दिउँसो १ बजेदेखि सुचारु गर्नका लागि जिल्ला सुरक्षा समितिले क्याम्पस प्रशासन र निर्वाचन समितिलाई पत्र लेख्ने निर्णय गरेको प्रजिअ अर्यालले बताए।
बैठकले असन्तुष्ट विद्यार्थी संगठन/समूहले आरोप लगाएको फर्जी विद्यार्थी भर्ना,मतपेटिकाको सिल नम्बर फरक भेटिएको लगायतका विषयमा छानबिन र कारबाहीका लागि सहायक प्रमुख जिल्ला अधिकारी सुमन कार्कीको संयोजकत्वमा ५ सदस्यीय छानबिन समिति गठनपनि गरिएको छ। उक्त समितिमा पर्साका प्रहरी नायब उपरीक्षक किशोर लम्सालका साथै विद्यार्थी संगठनबाट पनि दुई जना सदस्य रहने प्रजिअ अर्यालले बताए।
प्रतिक्रिया दिनुहोस !
