जाजरकोट : जाजरकोटमा ६ किलोग्राम लागुऔषधसहित तीनजना पक्राउ परेका छन् । भेरी नगरपालिका–१ रिम्ना बजारस्थित जाजरकोट–डोल्पा सडकखण्डमा नलगाड नगरपालिका–१० बस्ने २३ वर्षीय हरि बाँनिया, नलगाड नगरपालिका–९ बस्ने ३० वर्षीय दिपक सिंह र सोही वडाका २३ वर्षीय सुरेश सिंह पक्राउ परेको प्रहरीले जनाएको छ ।
सोमबार इलाका प्रहरी कार्यालय रिम्नाबाट प्रहरी नायब निरीक्षक शिउ कुमार चौधरीको नेतृत्वमा खटिएको टोलीले नियमित चेकजाँचका क्रममा कर्णाली प्रदेश ०२००१ च ११४५ नम्बरको रातो प्लेटको डबल क्याप बोलेरो जिपलाई रोकी जाँच गर्दा लागुऔषध फेला पारेको हो। उक्त बोलेरो जिप नलगाड नगरपालिका–१० बस्ने हरि बाँनियाले चलाइरहेका थिए ।
जिपमा सवार दिपक सिंह र सुरेश सिंहको साथबाट कालो रङ्गको सेन्थेटिक झोलामा लुकाइ छिपाइ राखिएको अफिम जस्तै देखिने ३/३ केजी अर्धठोस (गिलो) पदार्थ तथा दिपक सिंहको साथबाट नगद २५ हजार रुपैयाँ बरामद गरिएको जिल्ला प्रहरी कार्यालय जाजरकोटका सूचना अधिकारी प्रहरी निरीक्षक हरिराम डाँगीले जानकारी दिए ।
बरामद गरिएको औषधसहित बोलेरो जिपलाई नियन्त्रणमा लिइ तीनैजनालाई जिल्ला प्रहरी कार्यालय जाजरकोटको हिरासतमा राखिएको छ । उनीहरूविरुद्ध थप अनुसन्धानका लागि जाजरकोट जिल्ला अदालतबाट सात दिनको म्याद थप अनुमति लिइएको सूचना अधिकारी डाँगीले जानकारी दिएका छन् ।
प्रतिक्रिया दिनुहोस !
