काठमाडौं : अख्तियार दुरुपयोग अनुसन्धान आयोगले नेपाल धितोपत्र बोर्ड (सेवोन)मा बुधबार दिउँसो छापा हानेको छ । विभिन्न कम्पनीको प्रारम्भिक सार्वजनिक प्रस्ताव (आईपीओ) निष्कासनका लागि घूस मागेको समाचार प्रकाशित/प्रसारित भएपछि अख्तियारले सेबोनमा छापा हानेको हो ।
अख्तियारले आईपीओ निष्कासनका लागि अनुमति मागेका विभिन्न कम्पनीका फाइल नियन्त्रणमा लिएको स्रोतले बतायो । अख्तियारको टोली बुधबार दिउँसो ललितपुरको खुमलटारस्थित बोर्डको कार्यालयमा एक्कासि आइपुगेको सेबोन स्रोतले जनायो ।
निजी ऊर्जा उत्पादकहरूले आईपीओ निष्कासन स्वीकृति गर्नु अगाडि धितोपत्र बोर्डले घूस मागेको आरोप लगाउँदै आएका थिए । सोही आधारमा अख्तियारले छापा मारेको स्रोतले बतायो । सेबोन स्रोतकाअनुसार अख्तियारका प्रतिनिधिहरूले सम्बन्धित विभागका कर्मचारीहरूसँग पाइपलाइनमा रहेका आईपीओ, यसको प्रक्रिया र स्वीकृतिमा ढिलाइबारे सोधपुछ गरी विस्तृत विवरण खोजेका थिए । ‘सम्बन्धित विभाग, महाशाखासँग उनीहरूले आईपीओ स्वीकृतिबारे पछिल्लो स्थिति, स्वीकृतिको प्रक्रिया, पाइपलाइनमा रहेका कम्पनी र ढिलाइ किन भयो ? भनेर सोधेका थिए,’ स्रोतले भन्यो ।
सोही आधारमा आईपीओ पाइपलाइनमा रहेको ८९ कम्पनीबारे जानकारी दिइएको सेवोनले जनाएको छ । केही दिनदेखि निजी ऊर्जा उत्पादकहरूले लामो समयदेखि स्वीकृतिको पर्खाइमा रहेका जलविद्युत् कम्पनीको आईपीओ निष्कासन स्वीकृति गर्न कमिसन मागेको आरोप लगाउँदै आएका थिए । आईपीओ स्वीकृतिमा साह्रै कठिन भयो । कमिसन बिना काम गर्न गाह्रो भयो । पैसा नबुझाए काम अगाडि नबढ्ने भनेर केही ऊर्जा उत्पादकहरूले गुनासो गरेका थिए,’ स्रोतले भन्यो ।
आईपीओको अनुमति पर्खाइ, तर स्वीकृतिमा ढिलाइ
नेपाल धितोपत्र बोर्ड (सेबोन)मा विभिन्न कम्पनीहरूको आईपीओ (प्रारम्भिक सार्वजनिक प्रस्ताव) निष्कासनको अनुमतिको पर्खाइमा ८९ वटा कम्पनी छन् । यो संख्या असोज १२ गतेदेखि वैशाख २१ गतेसम्म आईपीओका लागि आवेदन दिएका कम्पनीको हो । यद्यपि यसबीचमा नगन्य कम्पनीले मात्रै आईपीओ निष्कासनको स्वीकृति पाए ।
स्वीकृत कम्पनीको आईपीओमा पनि नियामक निकायका केही प्रतिनिधिलाई मोटो रकम बुझाउनु परेको आरोप लागेको थियो । कार्यभार सम्हाल्ने बेला सेबोन अध्यक्ष सन्तोषनारायण श्रेष्ठले रोकिएका आईपीओ निष्कासन चाँडै सुरु हुने आश्वासन दिएका थिए । तर, उनले कार्यभार सम्हालेको लामो समयसम्म पनि पाइपलाइनमा रहेका कम्पनीहरूको संख्या बढ्दै गयो ।
आईपीओको अनुमति पर्खाइमा सबैभन्दा बढी हाइड्रोपावर क्षेत्रका कम्पनीहरू छन् । जलविद्युत् कम्पनीका मात्रै ४३ वटा कम्पनी आईपीओ निष्कासनको पर्खाइमा छन् । होटल तथा पर्यटन क्षेत्रमा ९ कम्पनीहरूले आईपीओको स्वीकृति मागेका छन् । यस्तै, लगानी क्षेत्रका ३ कम्पनी, म्यानुफ्याक्चरिङ तथा प्रोसेसिङ क्षेत्रमा १८ ओटा कम्पनी, लघुवित्त वित्तीय संस्थाअन्तर्गत एउटा कम्पनी, लघुवित्तमा अर्थात् माइक्रोइन्स्योरेन्स ३ वटा कम्पनी र अन्य क्षेत्रका १२ वटा कम्पनीहरूले आईपीओ निष्कासनको अनुमतिको पर्खाइमा छन् ।
प्रतिक्रिया दिनुहोस !
