नुवाकोट : ल्हेन्दी खोलामा आएको भीषण बाढीमा वेपत्ता सबैजनाको पहिचान खुलेको छ। बाढीमा बेपत्ता भएका सुरक्षाकर्मी, चिनियाँ नागरिक,नेपाली चालकको पहिचान खुलेको हो । बाढीमा १८ जना बेपत्ता भएका छन्।
रसुवागढी जलविद्युत केन्द्रको ड्याम साइडमा फसेका एकजना चिनियाँ नागरिक, १७ जना नेपाली गरी १८ जनालाई नेपाल प्रहरी,सशस्त्र प्रहरी बल नेपाल र नेपाली सेनाको उद्दार टोलिले उद्दार गरेको हो। हालसम्म उद्दार गरिएकाहरूमा चार महिला,४६ जना पुरुषसहित ५० जना रहेको सशस्त्र प्रहरी वलका प्रवक्त शैलेन्द्र थापाले जानकारी दिए ।
गोसाइकुण्ड गाउँपालिका–२ रसुवागढीमा बेपत्ता भएका १८ जनाको पहिचान खुलेको सशस्त्र प्रहरी बलले जनाएको छ । लेन्देखोलामा मंगलबार बिहान साँढे तीन बजेतिर आएको बाढीमा परी तीनजना नेपाल प्रहरी वेपत्ता भएका हुन् ।
बेपत्ता हुनेमा प्रहरी सहायक निरीक्षक लालबहादुर श्रेष्ठ, प्रहरी जवान मुन्ना ठाकुर र लोकेन्द्र बोहोरा छन् । उनीहरू तीनैजना इलाका प्रहरी कार्यालय टिमुरेमा कार्यरत रहेको रसुवा प्रहरीले जनाएको छ ।
बाढीमा परेर वेपत्ता हुनेहरूमा चिनियाँ नागरिकहरू यु युइ, ली हुवाछिन, याङ चुआन, यु हाइ हाङ, यु छिआओ छुइ र जोउ योङ रहेको सशस्त्र प्रहरी वलका सहप्रवक्ता थापाले जानकारी दिए । उनका अनुसार वेपत्ता हुनेहरुमा तीनजना गाडी चालक रहेका छन् ।
बाढीमा बर्दियाका ३६ वर्षीय जिपन चौधरी, ३५ वर्षीय सन्तोष दइत, २५ वर्षीय बुद्धिराम थारू,२४ वर्षीय लक्ष्मीनारायण थारू,३० वर्षीय सुरेश थारू,बागलुङका नरेन्द्र विक,सिन्धुपाल्चोकका फुर्वा लामा, गोविन्द मोक्तान र लोकमान तामाङ बेपत्ता छन् । लामा,मोक्तान र तामाङ गाडी चालक हुन् । बाढीले नेपाल–चीन सीमा रसुवागढीमा रहेको मितेरी पुल बगाएर दुई देशबिचको आवतजावत ठप्प भएको छ । बाढीका कारण स्याफ्रुबेँसी–रसुवागढी सडकको १० स्थानमा क्षति पुग्दा उद्धार तथा आवतजावत अवरुद्ध भएको छ ।
बाढीले एक सय ११ मेगावाट क्षमताको रसुवागढी जलविद्युत् आयोजनाको बाँधमा क्षति पुगेको छ भने टिमुरेस्थित भन्सार याड र त्यसभित्र रहेका कन्टेनरमा क्षति पुगेको प्रहरीले जनाएको छ । यसैगरी बाढीले रसुवाको उत्तरगया गापा- १ मैलुङस्थित नेपाली सेनाको पोष्ट अगाडि गल्छि–बेत्रावती– स्याफ्रुबेशीसडक खण्डको बेलीब्रिज बगाएको छ ।
यसका साथै बाढीले त्रिशुली थ्रि ए जलविद्युत आयोजनाको ड्याममा क्षति पुगेको छ । रसुवाको गोसाइँकुण्ड गापा २ तातोपानीस्थित पासाङल्हामु सडकमार्ग अन्तर्गत स्याफ्रुबेशी– रसुवागढी सडक खण्डमा भोटेकोशी नदीमा आएको बाढीले विभिन्न स्थानमा सडक पूर्ण कटान गरेको छ।
बाढीले नुवाकोट र रसुवामा भएको क्षतिको विवरण संकलन गरिरहेको प्रशासनले जनाएको छ ।
प्रतिक्रिया दिनुहोस !
