नुवाकोट : हत्कडीसहित फरार भएका थुनुवाहरूलाई प्रहरीले नियन्त्रणमा लिएको छ। अस्थायी प्रहरी चौकी मैलुङबाट फरार भएका उनीहरूलाई प्रहरीले नियन्त्रणमा लिएको हो। निर्माणाधिन त्रिशूली २१६ हाइड्रोपावरको ट्रिपरका चालक उत्तरगया गाउँपालिका- २ सिम्लेका २० वर्षीय सुमन भन्ने छिरिङ तामाङ र सोही हाइड्रोमा काम गर्ने सहचालक प्युठानको गौमुखी गाउँपालिका- ३ का २५ वर्षीय तनबीर पुनमगर हतकडीसहित फरार भएको थिए।
उनीहरूलाई मंगलबार डाँडागाउँको सिम्लेबाट पक्राउ गरिएको प्रहरीले जनाएको छ । उनीहरूलाई हाइड्रोको सामानसहित पक्राउ गरी अस्थायी प्रहरी पोष्ट मैलुङ रसुवामा राखिएको थियो। हत्कडीसहित फरार रहेका उनीहरू फरार भएको चार घण्टामै सिम्लेबाट पक्राउ गरिएको जिल्ला प्रहरी कार्यालय रसुवाले जनाएको छ ।
रसुवा उत्तरगया गाउँपालिका -१ मैलुङस्थित अस्थायी प्रहरीपोष्ट मैलुङको चेक पोष्टमा पनेरुको नेतृत्वको टोलीले निर्माणाधिन त्रिशूली २१६ हाइड्रोपावरको पावर चाइना कम्पनीको बाप्र.०१००४क१२७९ नं. को आइचर गाडीलाई रोकेर चेकजाँच गर्ने क्रममा उनीहरू पक्राउ परेको प्रहरीले जनाएको छ ।
उक्त गाडिमा पाँचसय किलोग्राम तौल बराबरको कवाडी सामान हाईड्रोपावरबाट चोरी गरी ल्याउँदै गरेको अवस्थामा उनीहरूलाई पक्राउ गरी हिरासतमा राखिएको थियो। सामानसहितको आइचर र कवाडी सामान अस्थायी प्रहरी पोष्ट मैलुङमा बुझाएको छ भने थुनुवाहरूलाई जिल्ला प्रहरी कार्यालय धुन्चे रसुवा लगिएको छ।
प्रतिक्रिया दिनुहोस !
