बागमतीका मेयर भरत थापा भ्रष्टाचार र अकुत सम्पत्ति आर्जनमा दोषी ठहर
साउन २२, २०८२ बिहीबार ९:३२:३६
काठमाडौं : सर्लाहीको बागमती नगरपालिकाका निलम्बित मेयर भरतकुमार थापा भ्रष्टाचार र अकुत सम्पत्ति आर्जनको मुद्दामा दोषी ठहर भएका छन् । विशेष अदालतका अध्यक्ष टेक नारायण कुँवर र सदस्यद्वय मुरारीबाबु श्रेष्ठ तथा विदुर कोइरालाको इजलासले थापालाई दोषी ठहर गरेको हो । विशेष अदालतले नदीजन्य पदार्थ हानिनोक्सानी गरी भ्रष्टाचार गरको मुद्दामा थापासहित तत्कालीन प्रमुख प्रशासकीय अधिकृत विमलकुमार पोखरेल, इन्जिनियर सागर पौडेल चौधरीलाई दोषी ठहर गरेको छ ।
मेयर थापा, विमलकुमार पोखरेल र सागर पौडेलले बागमती नगरपालिकाको मूल्य अभिवृद्धि करसहित बिगो ३० करोड २९ लाख ३४ हजार ८९७ को नदीजन्य पदार्थ हानिनोक्सानी गरेको देखिएको पनि फैसलामा उल्लेख छ । उनीहरूविरुद्ध भ्रष्टाचार निवारण ऐन, २०५९ को दफा १७ बमोजिमको कसुर गरेको ठहर गरिएको छ ।
प्रतिवादीहरू भरतकुमार थापा, विमलकुमार पोखरेल र सागर पौडेललाई ठहर भएको कसुरबापत हुने सजायको हकमा सजाय निर्धारण प्रयोजनार्थ फौजदारी कसुर (सजाय निर्धारण तथा कार्यान्वयन) ऐन, २०७४ को दफा ९ बमोजिम सुनुवाइका लागि भदौ २९ मा पेस गर्न आदेश भएको छ । विशेषले उपमेयर लीलाकुमारी मोक्तान, लेखा अधिकृत विश्वराज पोखरेल र जिल्ला समन्वय समितिका संयोजक मेथुर चौधरीलाई सफाइ दिएको सूचना अधिकारी यज्ञराज रेग्मीले जानकारी दिए ।
अकुतमा पनि थापा दोषी ठहर
मेयर थापा गैरकानुनी सम्पत्ति आर्जनमा दोषी ठहर भएका छन् । उनलाई एक वर्ष कैद र त्यति नै जरिवाना हुने ठहर अदालतले गरेको छ सो सम्पत्ति र त्यसबाट बढाइएको सम्पत्ति जफत हुने पनि अदालतले आदेश दिएको छ ।
विशेषले थापाको सम्पूर्ण आय र व्यय मूल्यांकन गर्दा उनको आय ९ करोड १४ लाख ३१ हजार रुपैयाँ ९१ पैसा रहेकामा व्यय १२ करोड ५९ लाख ५३ हजार रुपैयाँ १४ पैसा रहेको देखिएको फैसलामा उल्लेख छ । मेयर थापाले ३ करोड ४५ लाख २२ हजार ३८७ रुपैयाँ २३ पैसाबराबरको सम्पत्ति गैरकानुनी रूपमा आर्जन गरेको प्रमाणित भएको फैसलामा
उल्लेख छ ।
प्रतिक्रिया दिनुहोस !
