‘सुधारिएर उठ्ने छौं’

काठमाडौं : हालै सत्ताबाट बर्हिगमन भएको नेकपा एमाले चुनावको पक्षमा देखिएको छ । एमाले महासचिव शंकर पोखरेलले सुशीला कार्की नेतृत्वको अन्तरिम सरकार निर्धारित मितिमै चुनाव गराउने दिशामा अघि बढ्नुपर्ने बताएका छन् । 

च्यासलस्थित पार्टी केन्द्रीय कार्यालयको निरीक्षणपछि महासचिव पोखरेलले, ‘यो सरकार अन्तरिम भएकाले उसको कर्तव्य चुनाव गराउने हो । शान्ति सुरक्षाको वातावरण तयार गरिकन समयमा निर्वाचन गराउने कुरामा यो सरकार ध्यान जानेछ ।’ उनले नेपालका सबै लोकतान्त्रिक पार्टीहरू जनतामा गएर, जनताको अभिमत प्राप्त गर्ने कुरामा प्रवेश पर्ने समेत बताए । 

मध्यावधि निर्वाचन आगामी फागुन २१ गते गर्ने घोषणा गरिएको छ । भदौ २३ र २४ गते भएको जेन–जी आन्दोलनले एमाले नेतृत्वको सरकार ढलेको छ भने केन्द्रीय कार्यालयदेखि देशभरका कार्यालय, निर्वतमान प्रधानमन्त्री एवं पार्टी अध्यक्ष केपी शर्मा ओलीको बालुवाटारस्थित निवास, झापास्थित निवासका साथै धेरै मन्त्रीदेखि केन्द्रीय, जिल्लास्तरका नेताहरूमा घरमा आगलागी, तोडफोड र लुटपाट भएको छ । ध्वस्त भएको केन्द्रीय कार्यालयको निरीक्षण गर्दै महासचिव पोखरेलले एमाले झन् बलियो भएर उठ्ने दाबी गरे । 

जनताको भावनालाई सम्बोधन गर्ने सामर्थ्यसहित एमाले उठ्ने बताए । उनले देशलाई कमजोर बनाउने प्रवृत्तिविरुद्ध लड्न एमाले कहिल्यै कमजोर नहुने पनि बताए । ‘एमाले देशभक्तको मानक बनाएको पार्टी भएकाले हामी कहिल्यै कमजोर हुनेछैनौं ।’, उनले भने । 

हाम्रा कमीकमजोरी सुधार गर्दै उठ्ने छौं
उनले पार्टीमा भएका कमी कमजोरीलाई सुधार गर्दै उठ्ने बताए । ‘हाम्रा कमी कमजोरी होलान् । त्यसलाई सुधार गरिँदै लैजानुपर्छ,’ उनले भने, ‘हामी फेरि उठ्नेछौं । एकताबद्ध भएर, सशक्त भएर, जनताको भावनालाई सम्बोधन गर्ने सामर्थ्य लिएर उठ्नेछौं ।’

महासचिव पोखरेलले भदौ २३ र २४ को घटना नेपालको इतिहासमै योभन्दा ज्यादा विनाशकारी भएको बताए । एमाले महासचिव पोखरेलले एमालेले युवाहरूको चाहना र आकांक्षा पूरा गर्नेगरी योजना बनाइरहेका बेला दुःखद घटना भएको बताए । उनले भने, ‘युवाहरूले धैर्यता गरेको भए नेकपा एमालेले नै उहाँहरूको चाहना र आकांक्षा पूरा गर्ने पार्टीका रूपमा आउँदैथ्यो । हामीले त्यसखालका योजनाहरू तयार पारेका थियौं । ती योजनाहरू व्यवहारमा लागू गर्न नपाउँदै मुलुकको दुःखद घटना घट्यो ।’

हालैसम्म विधान महाधिवेशनमा युवाहरूमा हुर्किंदै गरेको रुचि र आकांक्षालाई कसरी सम्बोधन गर्न सकिन्छ भनेर लामो छलफल गरी निर्णायक शक्तिको २१ बुँदे योजना बनाएको उनले स्पष्ट पारे । महासचिव पोखरेलले युवाहरूको आकांक्षाका रूपमा सुशासन कायम हुनुपर्ने बताए । उनले सेवा प्रवाहमा प्रभावकारिता र विकासले गति लिओस् भन्ने अपेक्षा जायज रहेको बताए ।
उनले संविधानभित्रैबाट युवाको चाहनाबमोजिम सरकार बनाउन सकिने भए पनि त्यसविपरीत संविधानलाई कमजोर बनाउने प्रयत्न भएको आरोप लगाए ।

‘अहिले राजनीतिक परिस्थिति बदलिएको छ । युवाका नाममा सुशीला कार्कीजी प्रधानमन्त्री भएका छ । हामीले संविधानभित्रबाटै युवाको चाहनाबमोजिम सरकार बनाउन सकिन्छ भनेका थियौं । नेपालका राजनीतिक दलहरू पनि युवा आन्दोलनको भावना सम्बोधन गर्न तयार छन् भन्ने सन्देश सम्प्रेषण गरेका थियौं,’ उनले भने, ‘तर, त्यो कुरालाई उपेक्षा गरियो । आज जसरी अगाडि बढिएको छ, त्यसले लामो समयबाट प्राप्त भएको संविधान, हामीले स्थापित गरेको समावेशी प्रणाली, दुनियाँकै एउटा नमुना प्रणालीका रूपमा मानिन्छ । जनता सम्प्रभुता र अधिकार सम्पन्न भएको संविधानलाई कमजोर बनाउने प्रयत्न भइराखेका छन् ।’

उनले युवाको आन्दोलनलाई लुटपाटमा बदल्ने खालको काम, राष्ट्रलाई कमजोर बनाउने कामप्रति गम्भीर आपत्ति जनाउँदै दोषीहरूलाई पहिचान गरेर दण्डित गर्नुपर्ने बताए ।

एमाले महासचिव पोखरलले खरानी बनाएको संरचनामाथि नै उभिएर एमालेले संविधान दिवस मनाउने पनि स्पष्ट पारे । उनले भने, ‘यसपटक हामी हाम्रो क्षतिग्रस्त संरचनाको खरानीमा उभिएर संविधानसभाले संविधान बनाउँदाको परिकल्पना साकार पार्ने संकल्प गर्न चाहन्छौं । ७७ जिल्लाका साथीहरूलाई निर्देशन जारी गरिसकेका छौं । काठमाडौंं उपत्यकाका साथीहरूले पार्टी कार्यालयमा संविधान दिवसको आयोजना गर्नेछौं ।’ आगामी असोज ३ गते संविधान बनेको १० वर्ष पुग्दैछ । २०७२ साल असोज ३ गते संविधानसभाबाट पहिलोपटक नेपालको संविधान बनेको थियो ।