तीन जिल्लाको संयुक्त सूचना : सकेसम्म मुग्लिन-नारायणगढ र कोत्रे-मुग्लिन-नागढुङ्गा हुँदै यात्रा नगर्नू

काठमाडौं : पृथ्वी राजमार्गको कोत्रे-मुग्लिन-नागढुङ्गा र मुग्लिन-नारायणगढ सडक हुँदै यात्रा गर्दा सचेतना अपनाउन तनहुँ, चितवन र धादिङका जिल्ला प्रशासन कार्यालयले संयुक्त सूचना जारी गरेका छन्। 

जल तथा मौसम विज्ञान विभागका अनुसार आजदेखि असोज २० गतेसम्म भारी वर्षा हुनसक्ने पूर्वानुमान गरेकाले संयमित भएर यात्रा गर्न ती कार्यालयले संयुक्तरूपमा अनुरोध गरेका हुन्।

विभागका अनुसार भारी वर्षा हुनसक्ने पूर्वानुमान रहेको र उक्त पूर्वानुमानबमोजिन वर्षा भएमा सडक आवागमन थप जोखिमयुक्त हुनसक्ने सम्भावनालाई दृष्टिगत गर्दै संयुक्तरूपमा सूचना जारी गरी सार्वजनिक अपिल गरिएको छ।

भारी वर्षा हुने पूर्वानुमान गरिएको समय (आगामी २० गते) सम्म अत्यावश्यकबाहेक यात्रा नगर्न, यात्रा गर्नुपर्दा दिनको समयमा आ-आफ्नो गन्तव्यमा पुग्ने गरी गर्नु हुन तथा रातको समयमा यात्रा नगर्न अनुरोध गरिएको तनहुँका प्रमुख जिल्ला अधिकारी रामकृष्ण अधिकारीले जानकारी दिए। 

उनका अनुसार यात्रा गर्नुपर्ने अवस्थामा सुरक्षा निकायबाट आवश्यक जानकारी लिएरमात्र गर्न अनुरोध गरिएको छ। समय सीमाभित्र अत्यावश्यकबाहेक मालवाहक ठूला सवारीसाधन नचलाउन हुन पनि सूचनामा अनुरोध गरिएको छ। 

पूर्वानुमानबमोजिम वर्षा भएको खण्डमा वा त्यस्तो सम्भावना देखिएमा स्थानीय प्रशासनबाट राजमार्गमा आवागमन बन्द गर्नुपर्ने अवस्थासमेत आउन सक्ने भएकाले त्यस्तो अवस्थातर्फ सचेत एवं सतर्क रही आवश्यक सहयोग गरिदिनु हुन सम्पूर्ण यात्रु महानुभाव एवं संघ-संस्थामा अपिल गरिएको प्रजिअ अधिकारीले बताए।