विराटनगर : नेपाली कांग्रेसका वरिष्ठ नेता डा. शेखर कोइरालाले फागुन २१ गते तोकिएको निर्वाचनलाई शान्तिपूर्ण, सुरक्षित र निष्पक्ष बनाउन सरकार गम्भीर हुनुपर्ने बताएका छन् । निर्वाचनको मिति नजिकिँदै जाँदा देशका विभिन्न स्थानमा देखिएको असुरक्षा, फरार कैदीको अवस्था र हातहतियार लुटिएका जस्ता घटनाले लोकतान्त्रिक प्रक्रियामै प्रश्न उठ्ने अवस्था सिर्जना भएको भन्दै उनले सरकारको भूमिकामाथि कडा प्रश्न गरेका छन् ।
विराटनगर महानगरपालिका–६ सरौचियामा शनिबार बिहान आयोजित नेपाली कांग्रेसको पार्टी प्रवेश कार्यक्रमलाई सम्बोधन गर्दै नेता कोइरालाले कांग्रेस निर्वाचनबाट भाग्न खोजेको नभई अझै जिम्मेवार ढंगले निर्वाचनमा सहभागी हुन चाहेको स्पष्ट पारे । उनले भने, ‘कांग्रेसले निर्वाचनमा जाने निर्णय गरिसकेको छ । हामी निर्वाचनमा जान्छौं । तर, सरकारले न्यूनतम शान्ति सुरक्षाको प्रत्याभूति दिलाउनुपर्छ । अहिलेको अवस्था हेर्दा अझै पनि सार्पसुटरसहित जेलबाट ५ हजारभन्दा बढी कैदी फरार छन् । प्रहरीका हतियार लुटिएका छन् । यस्तो अवस्थामा निर्वाचन कसरी निष्पक्ष र शान्तिपूर्ण हुन्छ ? फरार कैदी पक्राउ गर्नु, लुटिएका हतियार बरामद गर्नु सरकारको पहिलो प्राथमिकता हुनुपर्छ । तर, सरकार त्यो दिशामा गम्भीर देखिँदैन ।’
सरकारको दोहोरो चरित्रप्रति पनि उनले प्रश्न उठाए । एकातिर राजनीतिक दलका नेता, यहाँसम्म कि पूर्वप्रधानमन्त्रीहरूलाई समेत काठमाडौं बाहिर जान नदिने, अर्कोतर्फ सरकारले निर्वाचन गराउँछु भनेर दाबी गर्ने अवस्था आफैंमा विरोधाभासपूर्ण रहेको उनको भनाइ थियो । यस्तो अवस्थामा सरकारले कस्तो निर्वाचन गराउन खोजेको हो ? भन्दै उनले विगतमा जस्तै सबै राजनीतिक दलहरूको सहभागितामा निर्वाचन हुनुपर्ने कांग्रेसको स्पष्ट धारणा रहेको बताए । कांग्रेस निर्वाचनप्रति सकारात्मक रहेको र लोकतान्त्रिक अभ्यासबाट कहिल्यै पछि नहट्ने पार्टी भएको उनले पुनः दोहोर्याए ।
नेता कोइरालाले भदौ २३ र २४ गते भएका तथाकथित जेनजी आन्दोलनका घटनालाई पनि छुट्टाछुट्टै रूपमा मूल्यांकन गर्नुपर्ने बताए । उनका अनुसार भदौ २३ गतेको घटना अत्यन्तै घृणित र निन्दनीय थियो, जसलाई कुनै पनि बहानामा माफी दिन सकिँदैन । तर, त्यसपछि भदौ २४ गते भएको घटनालाई पनि गम्भीर रूपमा लिनुपर्ने आवश्यकता रहेको उनको धारणा थियो ।
उनले भने, ‘सरकार र जेनजी पक्षले दुवै घटनालाई अलग–अलग रूपमा हेर्नुपर्छ भनेको भए पनि दुवै घटनामा संलग्न दोषीहरूलाई कानुनी दायरामा ल्याउनु अपरिहार्य छ ।’ विशेष गरी २४ गतेको घटना मुलुकका लागि अत्यन्त दुर्भाग्यपूर्ण भएको भन्दै त्यसले समाजमा नकारात्मक सन्देश दिएको कोइरालाले उल्लेख गरे ।
पार्टीको आन्तरिक अवस्थाबारे बोल्दै नेता कोइरालाले वर्तमान परिस्थितिका कारण नेपाली कांग्रेसको महाधिवेशन केही दिन तलमाथि हुन सक्ने आशंका व्यक्त गरे । १५ औं महाधिवेशनमा सभापतिको दाबी गर्दै आएका उनले पार्टीको नियमित महाधिवेशन समयमै हुनुपर्नेमा जोड दिए । त्यसका लागि सबै नेता–कार्यकर्ता एकताबद्ध भएर अघि बढ्नुपर्ने र विशेष गरी क्रियाशील सदस्यताको विषयलाई गम्भीर रूपमा लिनुपर्ने उनले बताए । पार्टीलाई बलियो बनाउन संगठनात्मक आधार मजबुत हुन आवश्यक रहेको उनको भनाइ थियो ।
वडास्तरीय अधिवेशनको सन्दर्भमा पनि नेता कोइरालाले कार्यकर्ता तथा नेताहरूलाई संयमता अपनाउन र परिपक्वता देखाउन सुझाव दिए । उनले वडाको अधिवेशनलाई सकेसम्म सहमतिमा सम्पन्न गर्न प्रयास गर्न आग्रह गर्दै यदि सहमति सम्भव नभए स्वस्थ प्रतिस्पर्धाबाट नेतृत्व चयन गर्नुपर्ने बताए । तर, प्रतिस्पर्धामा हार–जितलाई लिएर एकअर्कामाथि आरोप लगाउने, असन्तुष्ट गतिविधि गर्ने वा पार्टीलाई कमजोर बनाउने कार्य स्वीकार्य नहुने उनले स्पष्ट पारे । स्वस्थ प्रतिस्पर्धा लोकतान्त्रिक पार्टीको सुन्दर पक्ष भएको भन्दै त्यसलाई सम्मान गर्नुपर्नेमा उनले जोड दिए ।
प्रतिक्रिया दिनुहोस !
