हृदयेश त्रिपाठीलाई छोडेको मैदान सम्हालेका रामप्रसाद जित हात पार्ने दाउमा

परासी : आसन्न प्रतिनिधिसभा निर्वाचनमा नवलपरासी निर्वाचन क्षेत्र नम्बर १ बाट दुई निर्वाचनपछि नेकपा एमालेले आफ्नै उम्मेदवार उठाएको छ । स्थानीय निर्वाचनको अनुभव बटुलेका रामप्रसाद पाण्डेलाई एमालेले उम्मेदवार उठाएको हो ।

उनी सुस्ता गाउँपालिकाका पूर्वअध्यक्ष हुन् । २०७४ र २०७९ सालका दुई निर्वाचनमा एमालेले आफ्नै उम्मेदवार नउठाई नेता हृदयेश त्रिपाठीलाई समर्थन गरेको थियो । ति दुवै निर्वाचनमा एमाले कार्यकर्ताले आफ्नै उम्मेदवारलाई भोट दिन नपाएको गुनासो गर्दै आएका थिए । 

चुनाव प्रचारप्रसारका क्रममा पाण्डेले गाउँपालिका अध्यक्ष हुँदा गरेका कामको मतदाताहरुले प्रशंसा गरिरहेका छन् । त्यही काम पाण्डेका लागि मत माग्ने बलियो आधार बनेको छ । पाण्डेले कार्यकालमा पूर्वाधार, शिक्षा, कृषिलगायतका क्षेत्रको सुधार गरेको दाबी गरेका छन् । 

त्यसैगरी आठ वर्षपछि आफ्नै नेता मैदानमा उतारेपछि कार्यकर्तामा नयाँ उत्साह देखिएकाले पनि एमाले चुनाव जित्नेमा ढुक्क जस्तै देखिन्छ । ‘एमाले कार्यकर्ताका लागि यो चुनाव विशेष बनेको छ । किनकी लामो समयपछि हामीले आफ्नै चुनाव चिन्हमा आफ्नै उम्मेदवारलाई भोट हाल्ने अवसर पाएका छौं । त्यति मात्र होइन विकासप्रेमीका रुपमा रहनु भएका पाण्डेलाई क्षेत्रका अन्य दलका कार्यकर्ता र समर्थकको सहयोग रहने भएकाले जित सुनिश्चित छ,'एमाले कार्यकर्ता सन्तोष पाठकले भने । 

सो क्षेत्रबाट एमालेले २०७४ सालको निर्वाचनमा दलविहीन भएका हृदयेश त्रिपाठीलाई समर्थन गरेको थियो । राजपा छाडेर स्वतन्त्र राजनीतिक समूह गठन गरेका त्रिपाठी एमालेको सूर्य चिन्हबाट विजयी भएका थिए । २०७९ सालको निर्वाचनमा फेरि एमालेले त्रिपाठीलाई समर्थन गरेको थियो । जनता प्रगतिशील पार्टी(जप्रपा) गठन गरेर आफ्नै दलको चुनाव चिन्हबाट चुनाव लडेका त्रिपाठीलाई फेरि एमालेले समर्थन गर्दै उम्मेदवार उठाएको थिएन । तर त्रिपाठी भने पराजित भए । यी दुईवटै निर्वाचनमा एमालेले त्रिपाठीलाई मैदान खाली गरेपछि एमाले कार्यकर्ताहरू आफ्नै उम्मेदवारलाई भोट दिन पाएका थिएनन् । पाण्डेसँगै अहिले त्रिपाठी जसपाबाट चुनावी मैदानमा छन् । 

‘दुई पटकसम्म एमालेका कार्यकर्ता र समर्थकले आफ्नै उम्मेदवारलाई भोट दिन पाएनन् । अहिले गाउँ गाउँमा उत्साह छ । सबैको साथ र मतले जित निश्चित भन्नेमा विश्वस्त छ । ’ पाण्डेले भने । स्थानीय अनुभव, पार्टी संरचनाको सक्रियता र विगतको मतका आधारलाई जोडेर पाण्डेले जित्ने रणनीति अघि सारेको देखिन्छ । एमालेले २०७९ को निर्वाचनमा उक्त क्षेत्रबाट समानुपातिकतर्फ १७ हजार १७२ मत पाएको थियो । 

यो निर्वाचन क्षेत्रमा नेपाली कांग्रेसका विनोदकुमार चौधरी, जसपाका हृदयेश त्रिपाठी, नेपाली कम्युनिष्ट पार्टी(नेकपा) की सिन्धु ‘जलेसा’ बुढाथोकी, राष्ट्रिय स्वतन्त्र पार्टीका विक्रम खनाललगायत दल र स्वतन्त्र गरी २६ जना चुनावी प्रतिस्पर्धामा छन् ।