म जुत्ता

गोलीको आवाजसँगै
हरायो मेरो जोडी
अनि,

मलाई सधैं लगाएर हिँड्ने ऊ पनि
भिडहरूमा हराइसकेको छ।
मेरो शरीरभरि उसैको शरीरबाट चुहिएका
रगतका छिटाहरू पीडाको ज्वालामा जलेर
आर्तनाद गर्दैछन्, परिवर्तनको बिगुल फुक्दैछन्।
हरेक थोपा यी रगत
प्रश्न गर्छन् मलाई
के साँच्चै परिवर्तन आउँछ ?      
आउँछ भने कस्तो आउँछ ?      
म मौन छु।
म मात्र जुत्ता।
उसलाई गोली लागेपछि
भिडमा आतंकित हुँदै कुद्दा
उसकै खुट्टाबाट उछिट्टिएको छु।
ऊ र उसका साथीहरूझैँ
न्यायको पर्खाइमा बसेको छु।
उसको न्यानो स्पर्श र माया
सायदै अब पाउँला
तर आशा छ
उसको ज्यान अझै सुरक्षित छ।
उसको घाउ अवश्य निको हुनेछ।
र, परिवर्तनको शीतलतासँगै
उसले नयाँ जुत्ता पाउनेछ -
जसले बन्दुकको निशाना
खेप्नुपर्ने छैन।
मजस्तै गरी भिडमा हराउने छैन।
अनि
उछिट्टिएर कतै
नालीमा पनि खस्ने छैन।।

संगीता स्वेच्छा