मतदातालाई रकम वितरण गरेको आरोपमा कांग्रेसका तीन कार्यकर्ता प्रहरीको नियन्त्रणमा

विराटनगर : प्रतिनिधिसभा सदस्य निर्वाचन नजिकिँदै गर्दा मतदातालाई नगद वितरण गरेको आरोपमा प्रहरीले मोरङमा तीन जनालाई नियन्त्रणमा लिएको छ । रतुवामाईबाट नेपाली कांग्रेसका तीन जनालाई नियन्त्रणमा लिँदै प्रहरीले एउटा गाडी, करिब साढे चार लाख रूपैयाँ नगद, प्रचार सामग्री र नमुना मतपत्र बरामद गरेको छ । 

इलाका प्रहरी कार्यालय सिजुवाका इन्स्पेक्टर कैलाश लिम्बूको नेतृत्वमा गएको टोलीले शनिबार राति करिब ९:३० बजे रतुवामाई नगरपालिका–७ जामवाढीमा को १ च ७३३८ नम्बरको कार रोकेर चेकजाँच गर्दा उक्त रकम र सामग्री फेला परेको थियो । 
त्यसलगत्तै प्रहरीले गाडीभित्र रहेका रतुवामाई–८ का ४५ वर्षीय टेकनाथ घिमिरे, रतुवामाई–९ का ६० वर्षीय खड्गबहादुर चोङवाङ लिम्बू र ४८ वर्षीय चक्र नेपालीलाई नियन्त्रणमा लिएको हो । प्रहरी स्रोतका अनुसार टेकनाथ घिमिरे कांग्रेसको भ्रातृ संगठन नेपाल किसान महासंघ कोशी प्रदेशका सचिव हुन् भने खड्गबहादुर लिम्बू कांग्रेसको महाधिवेशन प्रतिनिधि र चक्र नेपाली पार्टीको क्रियाशील सदस्य छन् । 

उनीहरू आगामी फागुन २१ मा हुने प्रतिनिधिसभा सदस्य निर्वाचनलाई लक्षित गर्दै मतदातालाई प्रभावित पार्ने उद्देश्यले रकम वितरणमा संलग्न भएको हुनसक्ने अनुमान छ । बरामद रकम, प्रचार सामग्री र कारसहित तीनै जनालाई इलाका प्रहरी कार्यालय सिजुवामा राखिएको छ । प्रहरी स्रोतले यस रकमको स्रोत, ओसारपसारको उद्देश्य र संलग्न व्यक्तिहरूका बारेमा थप अनुसन्धान भइरहेको जनाएको छ ।
तर, मोरङ प्रहरीले सार्वजनिक रूपमा भने यस घटनालाई सामान्य सोधपुछको रूपमा प्रस्तुत गरेको छ । मोरङ प्रहरीका सूचना अधिकारी डीएसपी हरिनन्दन चौधरीले भने, ‘निर्वाचन आचारसंहिताविपरीत गतिविधिको सूचना आएपछि प्रहरी पुगेको हो । सामान्य सोधपुछपछि उनीहरूलाई छाडिएको छ । कोही पनि प्रहरीको नियन्त्रणमा छैनन् ।’ डीएसपी चौधरीले यसो भनिरहँदा तीन जना भने सिजुवा प्रहरीको नियन्त्रणमा रहेका छन् । 

स्थानीयका अनुसार निर्वाचन नजिकिँदै गर्दा केही व्यक्तिहरू मत माग्ने बहानामा आर्थिक प्रलोभन दिने प्रयासमा थिए । तर, निर्वाचन आचारसंहिता उल्लंघनको सम्भावित यो घटनाका बारेमा कस्तो निर्णय लिने भन्ने निष्कर्षमा प्रहरी पुगिसकेको छैन । प्रहरीले मतदातालाई प्रभावित पार्ने वा आचारसंहिताविपरीत गतिविधि गर्ने जानकारी भएमा तत्काल सूचना दिन सबैमा आग्रह गरेको छ । 

रतुवामाई मोरङको निर्वाचन क्षेत्र नम्बर २ मा पर्छ । जहाँ नेपाली कांग्रेसका डा. मिनेन्द्र रिजाल, नेकपा (एमाले)का दिलिप बगडिया, र राष्ट्रिय स्वतन्त्र पार्टी (रास्वपा)का कृष्णकुमार कार्की लगायतका उम्मेदवार चुनावी मैदानमा छन् । निर्वाचनलाई निष्पक्ष, स्वतन्त्र र भयमुक्त बनाउन प्रहरीले सुरक्षा सतर्कता बढाएको छ ।