रुपन्देहीको पाँच वटै क्षेत्र ‘क्लिन स्विप’ गर्दै रास्वपा

भैरहवा : राष्ट्रिय स्वतन्त्र पार्टी (रास्वपा) ले रुपन्देहीको पाँच वटै निर्वाचन क्षेत्र ‘क्लिन स्विप’ गर्ने भएको छ । हालसम्मको क्षेत्रगत रुपमा अन्तिम मतपरिणाम र मतगण्नाका अनुसार रास्वपाले पाँच वटै क्षेत्र आफ्नो पोल्टामा पार्दै ‘क्लिन स्विप’ गर्ने भएको हो । रुपन्देही जिल्लाको निर्वाचन क्षेत्र नम्बर–२ मा रास्वपाका उम्मेदवार सुलभ खरेल, ३ मा डा. लेखजंंग थापा र ४ मा कन्हैया बनियाँ निर्वाचित भएको मुख्य निर्वाचन अधिकृतको कार्यालयले जनाएको छ ।

निर्वाचन अधिकृतको कार्यालयका अनुसार, ५६ हजार ५५० मतका साथ खरेलले आफ्नो निकटतम प्रतिद्धन्द्धी नेकपा एमालेका उम्मेदवार विष्णुप्रसाद पौडेललाई पराजित गर्दै खरेल निर्वाचित भएका हुन् । पूर्व अर्थमन्त्री समेत रहेका पौडेलले १२ हजार ८ सय ६१ मत प्राप्त गरे । त्यस्तै नेपाली कांग्रेसका उम्मेदवार चुन्नप्रसाद शर्माले ९ हजार ३ सय ९२ मत प्राप्त गरे । १ लाख ३५ हजार ५० मतदाता रहेका यो क्षेत्रमा ८६ हजार ७ सय ३० मत खसेको थियो ।

क्षेत्र नम्बर–३ मा ५८ हजार ८ सय १४ मतका साथ थापा निर्वाचित भएका छन् । उनका निकटतम प्रतिद्वन्द्वी नेपाली कांग्रेसका उम्मेदवार सुशील गुरुङ्गले ८ हजार ४ सय ३५ मत प्राप्त गरे । नेकपा एमालेका उम्मेदवार वासुदेव घिमिरेले ८ हजार २ सय ७५ र राप्रपाका उम्मेदवार गौरव बोहराले ७ हजार ७ सय ८९ मत प्राप्त गरे भने नेकपाका उम्मेदवार फैज अहमद खानले २ हजार ५ सय ९४ मत प्राप्त गरेको मुख्य निर्वाचन अधिकृतको कार्यालयले जनाएको छ । १ लाख ४० हजार ३५ मतदाता रहेको यो क्षेत्रमा ९४ हजार २ सय ३२ मतदान भएको थियो ।

क्षेत्र नम्बर ४ का निर्वाचन अधिकृत टोपबहादुर बिष्टका अनुसार, २८ हजार ६६ मतका साथ बनिया निर्वाचित भएका छन् । उनका निकटतम प्रतिद्वन्द्वी नेकपा एमालेका उम्मेदवार प्रमोदकुमार यादवले २० हजार २ सय ६२ मत प्राप्त गरे । त्यस्तै नेपाली कांग्रेसका उम्मेदवार आशुतोष मिश्रा १५ हजार ६ सय १३ मत प्राप्त गरे भने जसपा नेपालका उम्मेदवार सर्वेन्द्रनाथ शुक्लाले ३ हजार चार सय १० मत ल्याउँदै चौथो स्थानमा सीमित भए । कुल १ लाख १६ हजार १७२ मतदाता भएकोमा ७७ हजार ५८ मत खसेको थियो ।

यस्तै क्षेत्र नम्बर १ र ५ मा रास्वपाले आफ्नोे फराकिलो अग्रता कायम राखेको छ । क्षेत्र नम्बर १ मा रास्वपाका उम्मेदवारले सुनिल लम्सालले २९ हजार ७ सय ३० मतका साथ अग्रता लिएका छन् भने हालसम्म नेपाली कांग्रेसका हिराबहादुर खत्री ६ हजार ३ सय ६३ मतका दोस्रो स्थानमा छन् । १ लाख ४६ हजार ८ सय २४ मतदाता रहेको यो क्षेत्रमा ९७ हजार १ सय १८ जनाले मतदान गरेका थिए ।

त्यस्तै क्षेत्र नम्बरमा रास्वपाका उम्मेदवार तौफिक अहमद खानले २७ हजार १५ मतका साथ दौडमा छन् भने हालसम्म एमालेका खिमलाल भट्टराई ८ हजार ९ सय ६१ मतका साथ दोस्रो स्थानमा रहेको निर्वाचन अधिकृतको कार्यालयले जनाएको छ । १ लाख ३४ हजार ४ सय ४२ मतदाता रहेको यस क्षेत्रमा ८४ हजार ८ सय ३८ मत खसेको थियो ।