उदयपुर : उदयपुरको चौदण्डीगढी नगरपालिका–७, बेल्टार बजारमा गएराति भएको आगलागीबाट दुई जनाको मृत्यु भएको छ । राती करिब २:३० बजे भएको आगलागीबाट लक्ष्मीनारायण खड्का र पवन खड्काको मृत्यु भएको जिल्ला प्रहरी कार्यालय उदयपुरका प्रहरी प्रमुख राजन चापागाईले जानकारी दिए ।
आगालागीबाट लक्ष्मीनारायण र रविनकुमार दासको घर पूर्ण रूपमा ध्वस्त भएको छ । लक्ष्मीनारायणको घरमा रहेको पुस्तक पसलको गोदाम समेत जलेर नष्ट भएको प्रहरीले जनाएको छ ।
आगलागीको कारण एकिन नभएपनि लक्ष्मीनारायणको किचन घरमा विद्युत् सर्टका कारण आगलागी भएको प्रहरीको प्रारम्भिक अनुमान छ । काठको घर भएकाले सहजै आगलागी भएको प्रहरीको भनाई छ ।
आगो नियन्त्रणका लागि चौदण्डीगढी नगरपालिका, त्रियुगा नगरपालिका, रौतामाई गाउँपालिका र सप्तरीको कञ्चनरूप नगरपालिकाबाट दमकल खटिएका थिए । नेपाल प्रहरी, सशस्त्र प्रहरी, नगर प्रहरी तथा स्थानीयवासीको सक्रिय सहयोगमा करिब तीन घण्टापछि आगो नियन्त्रणमा लिइएको जनाइएको छ ।
आगलागीबाट भएको क्षतिको विस्तृत विवरण संकलन भइरहेको इलाका प्रहरी कार्यालय बेल्टारका प्रहरी निरीक्षक प्रभात लिम्बुले जानकारी दिए । प्रहरीले घटनाको थप अनुसन्धान जारी रहेको जनाएको छ ।
प्रतिक्रिया दिनुहोस !
