विराटनगर : विराटनगर महानगरपालिका–१८ भेडियारीमा गाँजासहितको भारतीय नम्बर प्लेटको मोटरसाइकल रोकेर चेकजाँच गर्न खोज्दा फरार चालक पोखरीमा डुबेर बेपत्ता भएका छन् । मोरङ प्रहरीका डीएसपी सन्तोष श्रेष्ठका अनुसार बुधबार बिहान करिब ८ः५० बजेतिर मोटरसाइकल चालक स्थानीय मञ्जितकुमार यादव भाग्ने क्रममा भेडियारी पोखरीमा पसेका थिए । पोखरीमा हामफालेका उनी डुबेर बेपत्ता भएको श्रेष्ठले बताए ।
अस्थायी प्रहरी पोस्ट भेडियारीबाट असई ब्रह्मदेव यादवको नेतृत्वमा खटिएको टोलीले दुई जना सवार रहेको बीआर ५० एएल ३६८७ नम्बरको मोटरसाइकल रोकेर चेकजाँच गर्न खोजेको थियो । त्यसक्रममा चालक मोटरसाइकल छाडेर भागेका थिए । लगत्तै उनी पोखरीमा डुबेर बेपत्ता भएको प्रहरीले जनाएको छ ।
बेपत्ता यादवको खोजीका लागि नेपाल प्रहरी र सशस्त्र प्रहरी बल परिचालन गरिएको छ । घटनास्थलमा उनका आफन्तहरू भेला भई विवाद गरेपछि इलाका प्रहरी कार्यालय रानीबाट इन्स्पेक्टर प्रवीण घिमिरे तथा सशस्त्र प्रहरी बलको बीओपी जहदा भुटाहाबाट इन्स्पेक्टर तारानाथ गौतम नेतृत्वको टोली खटिएको छ । संयुक्त सुरक्षा टोलीले यादवको खोजी कार्य तीव्र पार्नुका साथै आफन्तहरूलाई सम्झाइबुझाइ गरिरहेको छ ।
मोटरसाइकलको पछाडि सवार भारतीय नागरिक भारतको सुपौल जिल्ला गनौरा पञ्चायत–५ निवासी ४१ वर्षीय शिवधर यादवलाई प्रहरीले गाँजा र मोटरसाइकलसहित नियन्त्रणमा लिएको छ । उनले बोकेको झोला जाँच गर्दा लुकाइछिपाइ राखिएको ६ किलो १३० ग्राम गाँजा बरामद भएको जानकारी डीएसपी श्रेष्ठले दिए । बरामद गाँजा र मोटरसाइकलसहित शिवधर यादवलाई इलाका प्रहरी कार्यालय रानीमा राखेर थप अनुसन्धान अघि बढाइएको प्रहरीले जनाएको छ ।
प्रतिक्रिया दिनुहोस !
