अमेरिका : इरान र अमेरिकाबीचको युद्धविरामको समय लम्बिएको छ । दोस्रो चरणको वार्ता हुने अनुमान भइरहेका बेला अमेरिकी राष्ट्रपति डोनाल्ड ट्रम्पले इरानसँगको युद्धविरामको समयावधि अचानक अनिश्चितकालका लागि लम्ब्याएका हुन् । युद्धविरामको समय लम्ब्याउनुअघि राष्ट्रपति ट्रम्पले इरानको शासन विभाजित रहेको दावी गरेका थिए ।
उपराष्ट्रपति जेडी भान्ससँगको दोस्रो चरणको वार्ताका लागि इरान पाकिस्तानमा उपस्थित नहुनुले नेतृत्व कति असंगठित भएको छ भन्ने देखाएको ह्वाट हाउसले दाबी गरेको थियो । तर इरानका पर्यवेक्षकहरूले यसलाई फरक तरिकाले हेर्छन् । इरानले वार्ता पुनः सुरु हुनुअघि संयुक्त राज्य अमेरिकाले आफ्ना बन्दरगाहहरूमा लगाएको नाकाबन्दी अन्त्य गर्नुपर्ने अडान लिएको छ । धेरै विश्लेषकहरू ह्वाइट हाउसले दावी गरेको भन्दा इरानको नेतृत्व बढी एकीकृत छ ।
मेहरान कामरावाले सीएनएनकी बेकी एन्डरसनसँग कुरा गर्दै नेतृत्व पर्याप्त रूपमा एकीकृत रहेको र यो युद्धको सञ्चालन र वार्तामा देखेको बताएका छन् । संयुक्त राज्य अमेरिका र इजरायलले शासनका अधिकांश शीर्ष सैन्य तथा राजनीतिक नेताहरू हटाएपछि इरानमा शासन अझ जटिल बनेको दावी गरेको छ । ह्वाइट हाउसले अस्तित्वमै खतरा ल्याउन युद्धका बीच इस्लामिक गणतन्त्रका विभिन्न राजनीतिक धारका अधिकारीहरूको समूह अहिले देशको भविष्यबारे निर्णय गरिरहेको दावी गरेको छ । आफ्ना दिवंगत पिताको उत्तराधिकारी बनेका सर्वोच्च नेता तथा अन्तिम निर्णयकर्ता मोजताब खामेनीको अनुपस्थितिमा अधिकारीहरुले काम गरिरहेको टिप्पणी गरेको छ ।
विज्ञहरुका अनुसार राजनीतिक मतभेद भए पनि यो समूह सार्वजनिक रूपमा एकता देखाउन दृढ देखिन्छ । युद्ध कसरी अगाडि बढाउने वा अमेरिकासँग कूटनीति कसरी गर्ने भन्ने विषयमा फरक धारणा भए पनि यो समूहमा सार्वजनिक एकता रहेको विज्ञ बताउँछन् । ‘इरानी नेतृत्वका विभिन्न समूहहरू अहिले युद्धअघिको भन्दा बढी एकीकृत छन्’, ट्रिटा पार्सीले सीएनएनसँग भने । ‘किनकी यो सानो समूह हो । यस समूहमा युद्ध रणनीतिबारे अझ बढी एकता छ’, उनले अली खामेनीको समयको अवस्थासँग तुलना गर्दै भने ।
यस साता इरान वार्तामा सहभागी हुन्छ कि हुँदैन भन्ने विषयमा तीव्र अड्कलबाजी भइरहँदा, तेहरानले आफ्नो सार्वजनिक अडान कायम राख्दै वार्ताकारहरू सहभागी नहुने बताएको थियो । उसले वाशिङ्टनलाई युद्धविराम उल्लंघन गरेको र ‘कूटनीतिक समाधानप्रति गम्भीर नभएको’ आरोप लगाएको थियो ।
युद्धअघि नै अली खामेनीको नेतृत्वमा इस्लामिक गणतन्त्रले स्पष्ट ‘रातो रेखा’ तय गरेको थियो । जसमा युरेनियम समृद्धि गर्ने अधिकार, क्षेप्यास्त्र विकास जारी राख्ने र आफ्ना सहयोगी समूहहरूलाई समर्थन गर्ने कुरा समावेश छन् । यी मागहरू अहिलेको ट्रम्प प्रशासनसँगको वार्तामा पनि कायम छन् ।
इरानको राजनीतिक नेतृत्वले आन्तरिक विवादको खबरलाई अस्वीकार गर्दै सैन्य लक्ष्य र वार्ता रणनीतिमा एकीकृत दृष्टिकोण देखाउन प्रयास गरिरहेको छ । ‘वरिष्ठ अधिकारीहरूबीच विभाजनको कुरा गर्नु इरानका विरोधीहरूको पुरानो राजनीतिक र प्रचारात्मक चाल हो’, इरानी राष्ट्रपतिका उपप्रवक्ता मेहदी तबातबाइले बुधबार एक्स (ट्वीटर) मा लेखेका थिए । ‘युद्ध क्षेत्र, जनता र कूटनीतिज्ञहरूबीचको एकता अहिले असाधारण र उल्लेखनीय छ ।’
प्रतिक्रिया दिनुहोस !
