वीरेन्द्रनगर : कर्णाली प्रदेशका युवाहरूको प्रतिभा पहिचान, नेतृत्व विकास र क्षमता अभिवृद्धि गर्ने उद्देश्यसहित ‘कर्णाली युवा महोत्सव’को दोस्रो संस्करण शनिबारदेखि वीरेन्द्रनगरमा सुरु हुने भएको छ। युवाका लागि साझा डबली, कर्णालीका लागि साझा सम्भावना भन्ने मूल भावसहित वैशाख १९ र २० गते वीरेन्द्रनगरस्थित सिटी हलको प्रांगणमा महोत्सव आयोजना हुन लागेको हो।
गत वर्ष माघमा सम्पन्न पहिलो संस्करणको सफलतापछि यस वर्ष महोत्सवलाई अझ परिष्कृत, व्यवस्थित र विषयगत रूपमा समृद्ध बनाउँदै दोस्रो संस्करण आयोजना गर्न लागिएको हो। कर्णालीका युवाहरूमा रहेको सिर्जनशीलता, क्षमता, सम्भावना र नेतृत्व ऊर्जा उजागर गर्दै उनीहरूलाई प्रदेशको विकाससँग प्रत्यक्ष जोड्ने उद्देश्यले महोत्सवलाई निरन्तरता दिइएको जनाइएको छ।
महोत्सव मुल आयोजक समितिका अनुसार महोत्सवले कर्णालीका युवालाई आफ्ना विचार, क्षमता, सिर्जना र सामाजिक उत्तरदायित्व प्रस्तुत गर्ने साझा मञ्च प्रदान गर्नेछ। मूल आयोजक समितिका संयोजक विनोदकुमार शाहीले कर्णालीका युवाहरूलाई आफ्नो शक्ति, सिर्जनशीलता र सम्भावनालाई उजागर गर्ने साझा डबलीका रूपमा महोत्सवलाई अघि बढाइएको बताए। उनका अनुसार महोत्सवमा कर्णालीको समृद्धिमा राज्यको दायित्व, जनप्रतिनिधि र युवाको सम्बन्ध, मिडियामा कर्णालीको स्थान, पर्यटन, शिक्षा, स्वास्थ्य तथा अवसर र चुनौतीजस्ता विषयमा गहन बहस र अन्तरक्रिया हुनेछन्।
महोत्सवको विशेष आकर्षणका रूपमा कर्णालीका विभिन्न क्षेत्रमा उदाहरणीय योगदान पुर्याएका १० जना युवालाई ‘कर्णाली युथ आइकन अवार्ड’ प्रदान गरिने भएको छ।
प्रतिक्रिया दिनुहोस !
