भारत : कोलकाताको ब्रिगेड परेड ग्राउन्डमा भारतीय जनता पार्टी (बीजेपी) को नयाँ सरकारको शपथ ग्रहण समारोहका क्रममा प्रधानमन्त्री नरेन्द्र मोदीले एक व्यक्तिलाई पहिले अंगालो हाली सम्मान गर्दै त्यसपछि झुकेर उनका पाउ छोए ।
ती व्यक्ति हुन् माखनलाल सरकार, जसलाई पश्चिम बंगालमा बीजेपीको सबैभन्दा ज्येष्ठ कार्यकर्ता मानिन्छ । उनी सन् १९५२ मा डा. श्यामाप्रसाद मुखर्जीको ऐतिहासिक कश्मीर यात्राको क्रममा उनीसँगै थिए । उनी लामो समयदेखि राष्ट्रवादी आन्दोलनसँग जोडिएका छन् र जेल पनि गएका छन् ।
सन् १९८० मा बीजेपीको स्थापना भएपछि उनले बंगालमा पार्टी र संगठन विस्तारमा महत्वपूर्ण भूमिका निभाए । सिलिगुडीमा काम गर्ने क्रममा तत्कालीन पश्चिम दिनाजपुर, दार्जिलिङ र जलपाइगुडी जिल्लामा संगठन संयोजकको रूपमा काम गर्दै उनले केवल एक वर्षभित्र १० हजार नयाँ सदस्य बनाए ।
माखनलाल सरकार त्यतिबेलादेखि नै बंगालमा संगठनको काम गर्दै आएका छन्, जब राज्यमा संघ वा बीजेपीको उपस्थिति लगभग नगण्य थियो । प्रदेश बीजेपी अध्यक्ष शमिक भट्टाचार्यले गत वर्ष अध्यक्ष पद सम्हालेपछि सिलिगुडीमा माखनलालको घर पुगेर उनलाई सम्मान गरेका थिए । अहिले उनको उमेर करिब ९८ वर्ष छ ।
सिलिगुडीका एक बीजेपी नेता तरुण मण्डल भन्छन्, ‘माखनलाल ८० को दशकदेखि नै बंगालमा संगठन यात्राका साक्षी रहँदै आएका छन् र यसमा उनको महत्वपूर्ण भूमिका छ । प्रचारको चमक–दमकबाट टाढा रहेर उनी क्षेत्रमै संगठनको जरा गाड्न र मजबुत बनाउन लागिरहे ।’ बंगाल चुनावमा बीजेपीको जितपछि उनी चर्चामा आएका थिए । त्यतिबेला पत्रकारहरूसँग कुरा गर्दै उनले सिलिगुडीमा गो–हत्या बन्द गराएका थिए । बंगालमा बीजेपीको जितबारे कति खुशी हुनुहुन्छ भन्ने प्रश्नमा उनले भनेका थिए, ‘म धेरै खुशी छु । मेरो जीवनभरको मेहनत सफल भयो ।’
उनको भनाइ थियो कि सिलिगुडी सिटमा शंकर घोषको उम्मेदवारीको निर्णय उनले नै गरेका थिए । उनी भन्छन्, ‘यदि मैले यस्तो नगरेको भए सिलिगुडीमा बीजेपीको जित सम्भव थिएन ।’ प्रधानमन्त्री नरेन्द्र मोदीले पश्चिम बंगालमा बीजेपीको पहिलो सरकार गठन भएपछि एक्समा पोस्ट पनि गरेका छन् । यस पोस्टमा उनले जनसंघका संस्थापक तथा माखनलाल सरकारको उल्लेख गरेका छन् ।
मोदीले लेखेका छन्, ‘आज जब पश्चिम बंगालमा पहिलो बीजेपी सरकार शपथ लिइरहेको छ, तब डा. श्यामाप्रसाद मुखर्जी र राष्ट्र तथा विशेषगरी पश्चिम बंगालका लागि उनको अमिट योगदान सम्झनु स्वाभाविक हो । हामी उनका सपनाहरू पूरा गर्न कुनै कसर बाँकी राख्ने छैनौं ।’
‘मैले कोलकातामा शपथ ग्रहण समारोहका क्रममा श्री माखनलाल सरकारसँग भेट गरें । समर्पित देशभक्त श्री सरकारले डा. मुखर्जीसँग काम गरेका थिए र जम्मु–कश्मीरमा उहाँसँगै गिरफ्तार पनि भएका थिए ।’ उहाँले पश्चिम बंगालमा हाम्रो पार्टीको आधार मजबुत बनाउन र समाजका हरेक वर्गका मानिसलाई पार्टीसँग जोड्न आफ्नो जीवन समर्पित गर्नुभयो ।’ ‘बीजेपी कार्यकर्ताको रूपमा हामीलाई गर्व छ कि हाम्रो पार्टीमा यस्ता प्रेरणादायी व्यक्तित्वहरू छन्, जसले जनताबीच रहेर पार्टीलाई मजबुत बनाएका छन् ।’
प्रतिक्रिया दिनुहोस !
