लगातार तीन वर्ष शून्य बेरुजु कायम गर्ने एकमात्र पालिका बन्यो महाभारत

काभ्रे : महाभारत गाउँपालिका लगातार तीन आर्थिक वर्षसम्म शून्य बेरुजु कायम गर्दै देशकै नमुना स्थानीय तहका रूपमा स्थापित भएको छ । 

महालेखा परीक्षकको कार्यालयले जेठ १ गते सम्माननीय राष्ट्रपतिसमक्ष पेस गरेको तथा सोमबार सार्वजनिक गरेको ६३औं वार्षिक प्रतिवेदनअनुसार देशभरका ७ सय ५३ स्थानीय तहमध्ये महाभारत गाउँपालिका शून्य बेरुजु कायम गर्ने उत्कृष्ट तीन स्थानीय सरकारमध्ये परेको हो ।

गाउँपालिकाले आर्थिक अनुशासन, पारदर्शिता र प्रभावकारी कार्यसम्पादनलाई प्राथमिकतामा राख्दै वित्तीय सुशासन कायम गरेकाले यो सफलता हासिल भएको जनाइएको छ । साथै लगातार तीन आर्थिक वर्षसम्म शून्य बेरुजु कायम गर्ने एकमात्र पालिका बन्न सफल भएको गाउँपालिकाले जनाएको छ ।

गाउँपालिकाले सार्वजनिक गरेको सन्देशमा भनेको छ, ‘हामी परिणाममा विश्वास गर्छौं, चाहे त्यो कार्यसम्पादन होस् वा शून्य बेरुजु । जनताको विश्वासलाई कहिल्यै गुम्न नदिने हाम्रो निरन्तर प्रयास रहनेछ ।’ शून्य बेरुजु कायम गर्न सहयोग पु¥याउने जनप्रतिनिधि, कार्यालय प्रमुख, लेखा प्रमुख, राष्ट्रसेवक कर्मचारी, सेवाग्राही तथा सहयोगी सबैप्रति गाउँपालिकाले धन्यवाद व्यक्त गरेको छ । स्थानीय तहमा सुशासन, पारदर्शिता र जिम्मेवार वित्तीय व्यवस्थापनको उदाहरणका रूपमा महाभारत गाउँपालिकाको यो उपलब्धिलाई हेरिएको छ । गाउँपालिका अध्यक्ष कान्छाराम जिम्बाको अथक मेहनतको परिणामका रूपमा यसलाई लिइएको स्थानीयले उल्लेख गरेका छन् । 

गाउँपालिकाका अध्यक्ष पहिलोपटक निर्वाचित हुँदा नेपालकै कान्छा जनप्रतिनिधि थिए । उनले महाभारत गाउँपालिकालाई विकटबाट सुगम बनाउन उल्लेख्य भूमिका खेलेका छन् ।