नेपालका कुन-कुन अस्पतालमा क्यान्सरको औषधि पाइन्छ सार्वजनिक गर्न सांसदको माग
असार ३, २०८३ बुधबार १३:२९:४४
काठमाडौं : नेपाली काङ्ग्रेसकी सांसद सीता थपलियाले देशभरका क्यान्सर अस्पतालहरूमा अत्यावश्यक औषधिको चरम अभाव देखिएको भन्दै संसदमा सरकारको गम्भीर ध्यानाकर्षण गराएकी छिन् ।
प्रतिनिधि सभाको आजको बैठकमा बोल्दै सांसद थपलियाले क्यान्सरका बिरामीले प्रयोग गर्ने 'सिस्प्लाटिन' र 'कार्बोप्लाटिन' जस्ता जीवनरक्षक औषधि बजारमा नपाइएको भन्दै यस विषयमा सरकार गम्भीर हुनुपर्ने बताइन् ।
स्वास्थ्य तथा जनसङ्ख्या मन्त्रीले केही समयअघि औषधि व्यवस्था विभागको निरीक्षण गरी निर्देशन दिए पनि तल्लो तहमा बिरामीहरूले अझै औषधि पाउन नसकेको उनको गुनासो छ । हिजो मात्रै भक्तपुर क्यान्सर अस्पतालमा किमोथेरापीका लागि पुगेका बिरामीहरू औषधि नपाएर छटपटाउनु परेको र औषधि खोजिदिन सांसदहरूसँगै गुहार मागेको उनले जानकारी दिइन् ।
सभामुखमार्फत स्वास्थ्य मन्त्रीलाई सम्बोधन गर्दै उनले हाल 'सिस्प्लाटिन' नेपालका कुन–कुन अस्पताल वा औषधि केन्द्रमा उपलब्ध छ, त्यसको विवरण बिरामी र उनीहरूका परिवारको जानकारीका लागि सरकारले तत्काल सार्वजनिक गर्नुपर्ने माग गरिन् ।
बिरामीहरूले अत्यावश्यक औषधि सहज रूपमा पाउने सुनिश्चितताबारे मन्त्रीले सम्मानित सदनलाई स्पष्ट जानकारी गराउनुपर्ने उनको भनाइ छ । 'बिरामीको जीवनसँग खेलबाड गर्ने काम नहोस्,' ध्यानाकर्षण गराउँदै उनले भनिन्, 'मन्त्रीज्यूले निर्देशन दिने मात्र होइन, बिरामीले भुइँतहमा औषधि पाए कि पाएनन् भनेर सम्बन्धित निकायहरूमा आफैँले बुझ्न समेत अनुरोध गर्दछु ।'
प्रतिक्रिया दिनुहोस !
