खामेनीको अन्त्येष्टिमा ट्रम्पको टिप्पणी : चाहेमा एकै आक्रमणमा सबै नेतृत्व समाप्त पार्न सक्छु

अमेरिका : अमेरिकी राष्ट्रपति डोनाल्ड ट्रम्पले इरानमा जारी रहेको खामेनीको अन्त्येष्टि कार्यक्रमबारे नयाँ अभिव्यक्ति दिएका छन् । उनले यदि चाहेको भए एकै आक्रमणमा इरानको बाँकी नेतृत्वलाई समाप्त पार्न सक्थे, तर उनले इरानले वार्ता गर्न चाहेकाले त्यसो नगरेको बताएका छन् । ट्रम्पले खामेनीप्रति श्रद्धाञ्जली दिन उपस्थित मानिसहरूको रुवाइलाई व्यङ्ग्य गर्दै भनेका छन्, ‘सायद यी नक्कली आँशु हुन् ।’

ट्रम्पको यो टिप्पणी दुवै देशबीच शान्ति सम्झौता धेरै हदसम्म लागू भइसकेको अवस्थामा आएको हो । ४ जुलाईदेखि इरानमा दिवंगत सर्वोच्च नेता अली खामेनीको अन्त्येष्टि कार्यक्रमहरू भइरहेका छन् । यी कार्यक्रममा एकै स्थानमा इरानको लगभग सम्पूर्ण नेतृत्व उपस्थित हुने बताइएको छ ।
रिपोर्ट अनुसार ट्रम्पले अन्त्येष्टि प्रक्रियाबारे पनि टिप्पणी गरेका छन् । उनले भनेका छन्, ‘उनीहरू सबै (इरानको बाँकी नेतृत्व) त्यहाँ हुनेछन् । यदि म चाहें भने एक आक्रमणमै सबैलाई समाप्त गर्न सक्छु । तर हामी त्यसो गर्ने छैनौं, किनकि हामी इरानसँग कुरा गर्न चाहन्छौं । यदि उनीहरू समाप्त भए भने हामी कोसँग कुरा गर्ने ?’

सायद यी नक्कली आँशु हुन् : ट्रम्प
इरानमा हालै पहिलो पटक दिवंगत नेता खामेनीको जनाजे कार्यक्रम राखिएको थियो । त्यहाँ धेरै देशका मानिसहरूले पुगेर श्रद्धाञ्जली दिएका थिए र केही मानिसहरू रोएका पनि देखिन्थे । ट्रम्पले यही रुवाइलाई लिएर टिप्पणी गर्दै भने, ‘मलाई लाग्थ्यो मानिसहरूलाई खामेनीसँग घृणा छ । सायद यी नक्कली आँशु हुन सक्छन् ।’

ट्रम्पको यस टिप्पणीको जवाफमा आर्मेनियास्थित इरान दूतावासले सामाजिक सञ्जाल ‘एक्स’ मा प्रतिक्रिया दिएको छ । पोस्टमा भनिएको छ, ‘तपाईं (ट्रम्प) यी कुरा बुझ्न सक्नु हुन्न, किनकि तपाईंसँग न त सभ्यता छ, न इतिहास छ, न सम्मान ।’

इरानको चेतावनी
अमेरिका र इजरायलसँग युद्धमा संलग्न रहिसकेको इरानले पनि यो कार्यक्रममाथि आक्रमणको डर व्यक्त गरेको छ । करोडौँ मानिस सहभागी हुने अनुमान गरिएको यस कार्यक्रममा ठूलो जनधनको क्षति हुन सक्ने आशंका छ । त्यसैले इरानले पहिले नै यस्तो कार्यक्रममाथि आक्रमण नगर्न चेतावनी दिएको छ ।

इरानी सरकारी मिडियाका अनुसार इस्लामिक सरकारद्वारा जारी बयानमा भनिएको छ, ‘यदि कुनै आक्रमण हुन्छ भने यसको कडा जवाफ दिइनेछ ।’ चेतावनी दिँदै भनिएको छ, ‘अमेरिका र जियोनिस्ट शासन (इजरायल) लाई कुनै पनि प्रकारको आक्रमण नगर्न चेतावनी दिन्छौँ, यदि यस्तो भयो भने कडा प्रतिक्रिया दिइनेछ ।’

ठूलो जनसमूह सहभागी हुने अनुमान
खामेनी केवल इरानका मात्र नभई विश्वभरका शिया समुदायका नेता भएकाले अन्त्येष्टिमा ठूलो भीड हुने अनुमान छ । सरकारी मिडियाका अनुसार हजारौँ मानिसहरूको ज्यान जाने जोखिम समेत रहेको बताइएको छ, किनकि यति ठूलो भीड व्यवस्थापन गर्न कठिन हुने भनिएको छ । कार्यक्रम करिब चार दिन चल्नेछ र अन्तिम दिन ९ जुलाईमा उनलाई उनको गृह नगर मशहदमा अन्त्येष्टि गरिनेछ ।