रोनाल्डोले तालमा फ्याँकेको माइक्रोफोन भेटियो

लियोन: पोर्चुगलका कप्तान क्रिस्टियानो रोनाल्डोले तालमा फ्याँकिदिएको पोर्चुगिज टेलिभिजन च्यानल सीएमटीभीको माइक्रोफोन भेटिएको छ । रोनाल्डोले जारी युरोकप फुटबल प्रतियोगिताअन्तर्गत हंगेरीविरुद्धको समूहगत चरणको आफ्नो अन्तिम खेलअघि आफ्नै देशको टेलिभिजन च्यानल सीएमटीभीको माइक्रोफोन तालमा फ्याँकिदिएका थिए ।

त्यति बेला पोर्चुगिज टोली बसेको फ्रान्सको लियोनस्थित होटलबाहिर रोनाल्डो सहकर्मीसँगै निस्किएका थिए । उनको पूर्वजानकारीबिना त्यहाँ पुगेका सीएमटीभीका संवाददाताले रोनाल्डोलाई माइक्रोफोन तेस्र्याउँदै प्रश्न सोध्न थालेका थिए । तर, रोनाल्डोले ती संवाददाताको प्रश्नको उत्तर दिनुको साटो माइक्रोफोन नै खोसेर नजिकै रहेको तलाउमा फ्याँकिदिएका थिए ।

यद्यपि सीएमटीभी च्यानलले नै विशेष तालि प्राप्त पौडीबाज ‘डाइभर' खटाएर सो माइक्रोफोन खोजेको हो । अन्तर्राष्ट्रिय सञ्चारमाध्यमहरूले भिजेको स्विम सुटसहित रोनाल्डोले फ्याँकेको माइक्रोफोन समाइरहेका डाइभरको तस्बिर सार्वजनिक गरेका छन् । सीएमटीभीले पनि माइक्रोफोन भेट्टाएको जनाएको छ । यद्यपि पानीमा भिजेर काम नलाग्ने भइसकेको माइक्रोफोन खोज्नुको उद्देश्यबारे भने केही बताएको छैन ।

 

प्रतियोगिताको सुरुआती दुई खेलमा पोर्चुगिज टोली आइसल्यान्ड र अस्ट्रियसँग बराबरीमा रोकिएपछि रोनाल्डोको आलोचना भएको थियो । रोनाल्डोले अस्ट्रियाविरुद्ध निर्धारित समयभित्रै पाएको पेनाल्टी प्रहारको अवसरसमेत गुमाएपछि उनको अझ आलोचना भएको थियो । यद्यपि उनले माइक्रोफोन फ्याँकेकै दिन पोर्चुगलले हंगेरीविरुद्ध ३–३ गोलको बराबरी खेल्दा भने रोनाल्डोले दुई उत्कृष्ट गोल गरेका थिए ।

अन्तर्राष्ट्रिय सञ्चारमाध्यमहरूले समूहगत चरणअन्तर्गत आइसल्यान्ड र अस्ट्रियाविरुद्धको खेलमा गोल गर्न नसकेको तनावमा रोनाल्डोले माइक्रोफोन फ्याँकिदिएको जनाएका थिए । यद्यपि पछिल्लो समाचारमा रोनाल्डो र सीएमटीभीबीच पुरानै द्वन्द्व रहेको जनाइएको छ । रोनाल्डोले सन् २०१४ देखि नै सीएमटीभी बहिष्कार गर्दै आइरहेको बताइएको छ ।

सो घटनापछि रोनाल्डोकै उत्कृष्ट प्रदर्शनमा हंगेरीसँग बराबरी खेल्दै प्रिक्वार्टरफाइनल पुगेको पोर्चुगल क्रोएसियालाई पराजित गर्दै क्वार्टरफाइनल पुगेको थियो । क्वार्टरफाइनलमा पनि पोल्यान्डलाई टाइब्रेकरमा पराजित गर्दै पोर्चुगल सेमिफाइनलमा पुगेको छ । सेमिफाइनलमा पोर्चुगलले वेल्सको समना गर्दैछ ।