भोटेकोशीमा बाढी आउँदा १५ घरमा क्षति
बाह्रबिसेः अविरल वर्षाका कारण भोटेकोशी नदीमा पानीको बहाबका कारण तातोपानी लिपिङका १५ घरमा क्षति पुगेको छ ।
बाढीका कारण नेपाल चीन मितेरी पुलदेखि तातोपानी हुँदै बाह्रबिसे सम्मको सडकखण्ड अन्तर्गत अरनिको राजमार्गका विभिन्न स्थानमा क्षति पुगेको जिल्ला प्रशासन कार्यालय सिन्धुपाल्चोकले एक प्रेस विज्ञप्ति जारी गरी जानकारी गराएको छ ।
बाढीले भन्सार कार्यालयमा रहेका दुईवटा ट्रिपर र भन्सारको क्यान्टीन बगाएको छ । त्यस्तै बाह्रबिसेमा रहेको कुखुराको फर्म तथा प्लाइउड फर्म बगाएको छ ।
ब्लक उद्योग तथा जाली बुन्ने उद्योग डुवानमा परेको छ । बाह्रबिसे मोटर ग्यारेजबाट टाटा सुमो र जिप बगाएको छ । त्यस्तै मार्मीङ र लिपिङ जोड्ने मध्ये भोटेकोशी आयोजनाको बेलीब्रिज पनि बगाएको छ ।
त्यस्तै तातोपानीको १० किलो भन्ने स्थानमा केही घरहरु जोखिममा रहेका छन् । नदीमा अझै पनि लेदो पहिरो आइरहेका कारण बाटाहरु अवरुद्ध भएका छन् ।
क्षतिको पूर्ण विवरण आउन बाँकी रहेको र उद्दारका लागि सुरक्षाकर्मीको टोली परिचालन गरिएको जिल्ला प्रशासन कार्यालयले जनाएको छ ।
बुधबार बाह्रबिसेमा भोटेकोशीको पानीको सतह सामान्य अवस्थाको भन्दा करिब १.५ मिटर बढी रहेको प्रशासनले जनाएको छ ।
जिल्ला प्रशासनले जारी गरेको विज्ञप्ति
प्रतिक्रिया दिनुहोस !
