दस लाख र पेस्तोलको झोला नजिकै शव भेटिएपछि...

धनगढी : दार्चुलाको घुसा गाविसको वडा नम्बर ८ धनबोरा भन्ने स्थानमा ९ लाख ९९ हजार नगदी र पेस्तोल सहितका दुई वटा झोला फेला परेका ब्यापारी मध्येका यार्सा ब्यापारी जमनसिह महताको हत्या गरिएको छ ।

झोला भेटिएको स्थान नजिकै चमेलिया नदीमा महताको धारिलो हतियार प्रयोग गरि हत्या गरिएको अवस्थामा सितोला गाविस ३ होपरीगाड घर भएका यार्सा ब्यापारी महताको शव फेला परेको जिल्ला प्रहरी कार्यालय दार्चुलाले जनाएको छ ।

प्रहरीले, व्यापारी महताको हत्या गरेर शव, नदीमा फालेको हुनसक्ने अनुमान लगाएको छ । सिप्टी ३ होपरीगाड घर भएका महता र सिप्टी गाविस वडा नंं ८ का दामोदरसिह धामीका नामको यार्सा संकलन पुर्जी समेत भएका दुई वटा झोला, मंगलबार घुसाको धनबोरामा फेला परेपछि प्रहरी त्यसतर्फ गएको थियो ।

झोला नजिकै रगत लागेको चाईनीज चक्कु भेटिएपछि हत्या भएको हुनसक्ने भन्दै प्रहरीले गरेको अनुमान सत्य सावित भएको छ । मंगलबार विहान धनबोरा क्षेत्रमा २ वटा झोला, २ थान छाता, एक थान यार्सागुम्बा जोख्ने तराजु, ढक, केही औषधी, एक किलो सतुवा, एक तोला यार्सागुम्बा र एक थान क्यालकुलेटर सहितका झोला फेला परेको थिए ।

खण्डेश्वरी प्रहरी चौकीबाट प्रहरी सहायक निरिक्षक र जिल्ला प्रहरी कार्यालयबाट प्रहरी निरिक्षक रणबहादुर चन्दको नेतृत्वको टोली धनबरा पुगेको प्रहरीले जनाएको छ । प्रहरील धामीको बारेमा केही पत्ता नलागेको जनाएको छ । सिप्टीका स्थानीयबासिका अनुसार धामी सतुवाका व्यापारी हुन् भने महता यार्सागुम्बाका व्यापारी हुन् ।