बाँधबारे कूटनीतिक तहमा कुरा गर्न सुझाव
काठमाडौं: पूर्वपरराष्ट्रसचिव मधुरमण आचार्यले सप्तरीस्थित दसगजामा भारतले एकतर्फी रूपमा बाँध बनाएपछि उत्पन्न तनावका विषयमा कूटनीतिक च्यानलबाट भारतसँग कुराकानी गरी समाधान गर्न सरकारलाई सुझाव दिएका छन् ।
‘सीमामा एकतर्फी रूपमा बाँध निर्माण भएको विषयमा स्थानीय जनताबाट खोजिएको समाधानको विषयलाई स्थानीय तहबाट समाधान गर्नुभन्दा कूटनीतिक च्यानलबाट भारतसँग कुराकानी गर्नु उपयुक्त हुन्छ', आचार्यले बिहीबार अन्नपूर्णसँग भने ।
परराष्ट्रसचिव शंकरदास बैरागीले मन्त्रालयले गृह मन्त्रालयसँगको सम्पर्कमा रही सप्तरीस्थित दसगजामा बाँध निर्माण भएको भन्नेबारे जानकारी लिइरहेको बताए ।
‘दसगजामा कसरी बाँध निर्माण गरियो भन्ने विषयमा जानकारी लिइरहेका छौं', उनले भने ।
गृह मन्त्रालयका प्रवक्ता यादवप्रसाद कोइरालाले सिमानामा एकतर्फी रूपमा बाँध निर्माणका सम्बन्धमा भारतीय पक्षसँग स्थानीय तहमा कुराकानी भएको बताए ।
‘अहिले तत्काललाई बाँध निर्माण रोकिएको छ । तर फेरि बाँध बन्न सुरु भए हामी परराष्ट्र मन्त्रालयमार्फत भारतीय केन्द्र सरकारसँग कुराकानी गर्नेछौं', उनले भने ।
'ओली सरकारको बहिर्गमनमा भारत खुसी वा दुःखी दुवै छैन'
भारतले नेपालमा भएको सत्ता परिवर्तनबाट भारत सरकार खुसी वा दुःखी दुवै नरहेको प्रतिक्रिया दिएको छ ।
नेपालमा ओली सरकारको बहिर्गमनबाट भारत खुसी भएको भन्ने समाचार आइरहेको छ नि भन्ने पत्रकारको प्रश्नमा भारतीय विदेश मन्त्रालयका प्रवक्ता विकास स्वरूपले बिहीबार भने, ‘नेपालमा नयाँ सरकार बन्दा हामी न दुःखी न खुसी हुन्छौं । नेपालमा जुनसुकै सरकार आए पनि मिलेर काम गर्ने भारत सरकारको दायित्व हुन आउँछ ।'
नयाँदिल्लीस्थित भारतीय विदेश मन्त्रालय साउथ ब्लकमा आयोजित पत्रकारसम्मेलनमा नेपालमा नयाँ गठबन्धन बनाउन भारतको हात छ भनी सोधिएको प्रश्नमा उनले भने, ‘नेपालको पछिल्लो राजनीतिक परिवर्तन पूर्ण रूपमा नेपालको आन्तरिक मामिला हो । यसमा मैले टिप्पणी गर्नु उपयुक्त हुँदैन ।'
नेपालमा बाढीपहिरोका कारण भइरहेको जनधनको क्षतिबारे सोधिएको प्रश्नमा स्वरूपले भने, ‘नेपालमा बाढी र पहिरोका कारण भएको जनधनको क्षतिप्रति हामी दुःख व्यक्त गर्न चाहन्छौं । बाढीका कारण भारततर्फका सीमावर्ती भूभागसमेत प्रभावित भएका छन् ।'
उनले नेपाललाई बाढीका कारण परेको अप्ठ्यारो अवस्थामा जुनसकै सहयोग गर्न तयार रहेको बताए । ‘नेपाल सरकारले आग्रह गरेअनुसार हामी बाढी नियन्त्रणमा सहयोग गर्छौं', उनले भने ।
प्रतिक्रिया दिनुहोस !
