नक्सालका सुशील उत्कृष्ट बक्सर

काठमाडौंः नक्सालका सुशील थापा प्रथम अन्तर क्लब उपत्यकाव्यापी खुला पुरुष बक्सिङ प्रतियोगितामा सोमबार उत्कृष्ट खेलाडी घोषित भएका छन् । नेपाल खेलकुद महासंघअन्तर्गतको राष्ट्रिय बक्सिङ संघ नेपालद्वारा आयोजित प्रतियोगितामा सुशीलले ४९ केजी तौलसमूहमा स्वर्ण पदक जिते । फाइनलमा सुशीलले त्रिभुवन आर्मी क्लबका मिसलदीप सुनवारलाई अंक आधारमा पराजित गरे । उत्कृष्ट चुनिए वापत सुशीलले १० हजार रुपैयाँ पुरस्कार पाए ।

लैनचौरस्थित राष्ट्रिय टेबुलटेनिस प्रशिक्षण केन्द्रमा भएको ५२ केजी तौलसमूहको फाइनलमा आर्मीका करण चौधरीले आफ्नै क्लबका सुदीप श्रेष्ठलाई हराउँदै पहिलो स्थान हासिल गरे । ५६ केजी तौलसमूहमा नक्सालका गणेश थापाले स्वर्ण पदक हात पारे । उनले फाइनलमा आर्मीका मुनाल पुनमगरको चुनौतीलाई समाप्त पारे । ६० केजीमा नक्सालका युवराज कार्की च्याम्पियन बने । फाइनलमा उनले नक्सालकै किशोर शर्मालाई पन्छाए ।

यसैगरी ६४ केजी तौलसमूहमा आर्मीका मोहन ठकुरीले फाइनलमा ललितपुरका अनोज भण्डारीलाई निराश पार्दै स्वर्ण पदक जिते । ६९ केजीमा बानुज फिटनेसका अनिश श्रेष्ठ शीर्ष स्थानमा रहे । फाइनलमा उनले काठमाडौं बक्सिङ क्लबका सुरज मगरलाई पाखा लगाए । ७५ केजी तौलसमूहमा आर्मीका केशव बम पहिलो भए । उनले फाइनलमा आर्मीकै हर्कराम विकलाई हराए ।

यसैगरी ८१ केजीमा ललितपुरका मनोहर बस्नेतले बाजी मारे । उनले उपाधि भिडन्तमा आर्मीका ध्रुव रानाभाटलाई निराश पारे । ९१ केजीमाथि आर्मीका रोशन गोदारले फाइनलमा केन्द्रीय बक्सिङका मेघ डानियल लामालाई हराउँदै पहिलो स्थान कब्जा गरे । केशव टेक्निकल नकआउटका आधारमा विजयी भए भने बाँकी सबै अंक आधारमा विजेता बने । प्रत्येक स्पर्धामा पहिलो हुनेले दुई हजार, दोस्रोले एक हजार पाँच सय र तेस्रो हुने दुई खेलाडीले एकएक हजार रुपैयाँ पुरस्कार प्राप्त गरे ।

प्रतियोगितामा आर्मी क्लब टिम च्याम्पियन बन्यो । आर्मीले सर्वाधिक पाँच स्वर्ण जित्दै टिम च्याम्पियनको उपाधि उचालेको हो । विजेतालाई पूर्वप्रधानमन्त्री झलनाथ खनाल, राष्ट्रिय खेलकुद परिषद्का उपाध्यक्ष लामा टेन्डी शेर्पा, एनओसी अध्यक्ष जीवनराम श्रेष्ठ, आयोजक संघका अध्यक्ष प्रेम प्रधानलगायतले पुरस्कृत गरे । साउन १३ गतेदेखि सुरु भएको उक्त प्रतियोगितामा ११ क्लबका ५१ जना खेलाडीले प्रतिस्पर्धा गरेका थिए ।

यसैबीच, टेबुलटेनिस राष्ट्रिय खेलाडी स्वेच्छा नेम्वाङको पहलमा बक्सिङ खेलाडी स्व. इन्द्रबहादुर पुनमगरको परिवारका लागि आर्थिक सहयोग संकलन गरिएको छ ।

स्वेच्छासहित राष्ट्रिय बक्सिङ संघ नेपाललगायतबाट ४० हजार रुपैयाँ आर्थिक सहयोग संकलन गरिएको हो । उक्त रकम सोमबार स्व. इन्द्रका परिवारलाई हस्तान्तरण गर्ने गरी बक्सिङका प्रमुख प्रशिक्षक प्रकाश थापामगरलाई प्रदान गरिएको छ ।