भारतको विहार राज्यलाई अराजकता र राज्यविहीनताको पर्यायका रूपमा लिइन्थ्यो, कुनै बेला । भ्रष्टाचार र अराजकतामाथि विहारको एकाधिकार थिएन भारतभित्र, तर कुनै रूपमा भारतका अन्य भागले पनि विहारलाई हेय दृष्टिका साथ हेर्दथे ।
विभिन्न किसिमका अपराधहरूको बिगबिगीकै बीचमा सन् ८० को मध्यतिर एकजना न्यायाधीशले अत्यन्तै सनसनीपूर्ण निर्णय सुनाए, जुन त्यहाँको सुरक्षा अधिकारी र राज्य प्रशासनका लागि एउटा अपमानजनक थप्पड नै थियो, एउटा न्यायिक संस्थाद्वारा । विहारमा अपहरणको उद्योग र त्यसमा संलग्नहरूले समानान्तर सरकार चलाएको उनको टिप्पणी थियो, एउटा न्यायिक इजलासमार्फत ।
त्यसको झन्डै २५ वर्षपछि मुख्यमन्त्रीका रूपमा नीतिशकुमारले जिम्मेवारी सम्हालेपछि विहारको छविमा सुधार आयो । विकास कार्यले तीव्रता लिएलगत्तै अराजकता र भ्रष्टाचारका आरोपबाट ऊ मुक्त भएजस्तो देखिएको र अपहरणका घटनामा पनि कमी आउन थाले, यद्यपि त्यो समाप्तै हुन सकेन ।
तर केही वर्षकै अन्तरमा अपहरणको त्यो उद्योगमा भारतीय या विहारका अपराधीहरूले सीमावर्ती नेपाल क्षेत्रमा हैन, केही त्यस्तै प्रवृत्तिका नेपालीहरूसँग साँठगाँठ बढाए । नेपालभित्रबाट अपहरण गरी सीमापारि लैजाने या उताबाट अपहरण गरी नेपलामा बन्धक बनाउने र अपहरितका परिवारसँग फिरौतीको डिल गर्ने काम ती आपराधिक समूहले गर्न थाले ।
विहारको कटिहार जिल्ला सोमबार र आइतबार ठप्प रहे । त्यहाँका एकजना सम्पन्न वासिन्दाका चार वर्षीया छोरी स्पर्शलाई अपराधीहरूले अपहरण गरी सीमावर्ती विराटनगरमा ल्याए । स्पर्शका परिवारसँग फिरौतीबारे 'डिल' गर्ने तयारी अपराधीसमूह या त्यसका नाइकेले गर्दै गर्दा नेपाल प्रहरीले उनीहरूलाई गिरफ्तार त गर्यो नै, त्योसँगै विहार प्रहरीको रोहवरमा स्पर्शका बा–आमालाई छोरी बुझाए ।
नेपाल प्रहरीले आफ्ना कर्तव्यपरायणतालाई व्यावसायिक र दक्ष ढंगले सावित त गर्यो, उसले मानवीय संवेदनशीलतासँगै नेपाली भूमिलाई स्वदेशी या विदेशी आपराधिक समूहद्वारा प्रयोग हुन नदिने सरकारको प्रतिबद्धतालाई पनि व्यवहारमा उतार्यो ।
नेपाल र भारतबीचका सम्बन्धमा राजनीतिक र कूटनीतिक तहमा उतारचढाव तथा तीक्तता अपवादका विषय हैनन् । तर दुवै मुलुकमा शान्ति र सार्वजनिक सुरक्षा सामान्य जनताका अधिकार हुन् । दुईतिरका सुरक्षा निकायहरूले दक्षता र इमानदारीसाथ सीमावर्ती क्षेत्रका आपराधिक समूह र उनीहरूका गतिविधिमा निगरानी र नियन्त्रण अनि उनीहरूलाई कानुनको दायरामा ल्याउन सके भने सीमावर्ती क्षेत्रलाई अपराधमुक्त राख्न सहज हुनेछ ।
स्पर्शका अपहरणकारीहरूको गिरफ्तारी र नेपाल प्रहरीद्वारा देखाइएको कर्तव्यपरायणतालाई सीमापारिले सही रूपमा प्रशंसा गर्न सक्यो भने भोलिका दिनमा पनि अपराधविरुद्धका गतिविधिमा सहयोगद्वारा अपेक्षित सफलता हासिल हुनेछ ।
प्रतिक्रिया दिनुहोस !
