ओलम्पिकको पुरस्कार वितरणमा बिहेको प्रस्ताव
एजेन्सीः आफ्नी प्रेमिकालाई बिहेका लागि प्रस्ताव गर्ने सही अवसर कहिले हुन सक्छ ?
चीनका पौडी खेलाडी क्विन काई त रियो दी जेनेरियोमा जारी गृष्मकालीन ओलम्पिक खेलकुदको पुरस्कार वितरण समारोहमै आफ्नी प्रेमिकालाई बिहेको प्रस्ताव राखेर रमाइलो समाचारको विषय बनेका छन् । ओलम्पिक खेलकुदअन्तर्गत पौडीको महिला डाइभिङ स्पर्धामा चीनकी ही जीले आइतबार रजत पदक जितेकी थिइन । ओलम्पिक खेलकुदमा पदक जितेको खुसी मनाइरहँदा उनले खुसी हुनुको अर्काे कारण पनि पाइन् ।
जी आफूले जितेको पदक ग्रहण गरेर फर्कंदै थिइन्, अचानक उनका प्रेमी काई उनीतर्फ अघि बढे । त्यसपछि प्रेमी काईले पुरस्कार वितरण समारोहको समाचार संकलनका लागि उपस्थित दर्जनौं सञ्चारकर्मीका अगाडि नै आफ्नी प्रेमिका जीसमक्ष विवाहको प्रस्ताव राखे । पदक लिएर फर्कंदै गरेकी प्रेमिका जीलाई बीचैमा रोकेर काईले आफूले ल्याएको औंठी दिँदै घुँडा टेकेर विवाहको प्रस्ताव राखेका थिए ।
काईको उक्त व्यवहारले रंगशालामा उपस्थित सबैको ध्यान तानेको थियो । त्यसपछि सञ्चारकर्मीका क्यामेराको लेन्स पनि उनीहरूतर्फ नै मोडिएको थियो । रंगशालामा उपस्थित दर्शकले समेत ताली बजाएर उनीहरूलाई साथ दिएका थिए । आफ्नो पूर्वजानकारी बिना नै प्रेमीले सार्वजनिक कार्यक्रममा विवाहको प्रस्ताव गरेपछि जी भने केही लजाएकी थिइन् । केहीबेर अकमक्किएकी जीले प्रेमी काईको प्रस्तावलाई स्वीकार गरेकी थिइन् ।
के तिमी मसँग बिहे गर्छौ, भन्ने काईको प्रस्तावमा जीले ‘यस’ भन्ने जवाफ फर्काएकी थिइन् । केहीबेर रंगशालाको वातावरण नै नै रमाइलो बनेको थियो । काईले प्रेमीका जीलाई विवाहका लागि प्रस्ताव राख्दा टेलिभिजनहरूले पदक वितरण समारोहको प्रत्यक्ष प्रसारण गरिरहेका थिए । टेलिभिजनहरूले काईको प्रस्ताव र जीको स्विकारोक्तिलाई समेत प्रसारण गर्न भ्याए ।
जीले आइतबार महिलातर्फको तीन मिटर स्प्रिङबोर्ड स्पर्धामा रजत पदक जितेकी थिइन् । काईले पनि जारी ओलम्पिकमा पुरुषतर्फको तीन मिटर सिन्क्रोनाइज्ड स्प्रिङबोर्ड स्पर्धामै कांस्य पदक जितेका थिए । जीले आफू पछिल्लो ६ वर्षदेखि काईसँगको प्रेम सम्बन्धमा रहेको खुलासा गरेकी छन् ।
यद्यपि काईले रियो ओलम्पिकका क्रममा आफूलाई यसरी बिहेको प्रस्ताव राख्लान् भनेर आफूले नसोचेको जीले बताइन् । ‘हामी पछिल्लो ६ वर्षदेखि प्रेम सम्बन्धमा छौं तर, काईले यसरी बिहेको प्रस्ताव राख्लान् भनेर मैले सोचेकी थिइनँ’, जीले भनिन्, ‘उनले मलाई धेरै कुरा भनेका छन् । धेरै वाचा पनि गरेका छन् । ती वाचाभन्दा पनि महŒवपूर्ण कुरा म उनलाई जीवनभर विश्वास गर्न सक्छु ।’
प्रतिक्रिया दिनुहोस !
