चरेस उद्योगमा प्रहरीको छापा

वीरगन्जःप्रहरीले चरेस बनाउने उद्योगमा छापा मारेर ठूलो परिमाणमा चरेससहित एकजनालाइ पक्राउ गरेको छ । पर्साको पटेर्वासुगौली गाविस १ को घाघी खोलाछेउमा सञ्चालित चरेस उद्योगमा प्रहरीले मंगलबार साँझ छापा मारेर चरेस बनाउँदै गरेको अवस्थामा पटेर्वा सुगौली गाविस १ का ५० वर्षीय रामचन्द्र पासवानलाई पक्राउ गरेको हो ।

छापा मार्ने क्रममा प्रहरीले चरेस बनाउने उद्योगबाट दुई बोरामा रहेको ४५ केजी तयारी चरेस, चरेस बनाउने मेसिन पाँच थान, ना ३७ प ६७०५ नम्बरको मोटरसाइकल, ढक, तराजु, रिन्चीलगायतका उपकरण पनि बरामद गरेको छ ।

विशेष सुराकीको आधारमा इलाका प्रहरी कार्यालय पोखरिया र जिल्ला प्रहरी कार्यालय पर्साबाट प्रहरी नायब उपरीक्षक होविन्द्र बोगटीको नेतृत्वमा खटिएको प्रहरीको टोलीले चरेस बनाउने उद्योगमा छापा मारेको हो ।

घाघी खोलाको नजिक फुसको छाप्रोमा चरेस उत्पादन गर्ने धन्दा भइरहेको सूचना पाएपछि प्रहरीले मंगलबार साँझ छापा मारेको प्रहरी उपरीक्षक राजुबाबु श्रेष्ठले बताए ।

प्रहरीले छापा मार्ने क्रममा अरू पनि व्यक्ति छाप्रोमा भए पनि उनीहरू भाग्न सफल भएको र पासवान मात्रै पक्राउ परेको प्रहरी उपरीक्षक श्रेष्ठले बताए ।

मकवानपुर र धादिङमा उत्पादित चरेसको कच्चा पदार्थ पटेर्वासुगौलीमा ल्याएर कारोबारीले प्रशोधन गरी तयारी चरेस भारतका विभिन्न स्थानमा पुर्‍याउने गरेका थिए । पक्राउ परेका पासवानलाई जिल्ला प्रहरी कार्यालय पर्साको हिरासतमा राखेर थप अनुसन्धान भइरहेको पनि प्रहरी उपरीक्षक श्रेष्ठले जानकारी दिए ।