६ वर्षपछि गंगामायाले अनसन तोडिन्

काठमाडौँः द्वन्द्वकालमा मारिएका आफ्ना छोराका हत्यारालाई सजायको मागसहित वीर अस्पतालको शैयामै आमरण अनसन बसेकी गोरखा फुजेलकी गंगामाया अधिकारीले अनसन तोडेकी छन् ।

मृतक छोरा कृष्णप्रसादको हत्याका बिषयमा चितवन जिल्ला अदालतले गंगामायाको साक्षी वकपत्र गराउने आदेश दिएपछि कानुनव्यवसायी र मानवअधिकारबादीको राय सल्लाहामा सोमबार साँझ अनसन तोडेकी हुन् ।

‘हत्याका अभियुक्तविरुद्ध चलेको कर्तव्य ज्यान मुद्दामा चितवन जिल्ला अदालतले गंभिरता देखाएर गंगामायाको वकपत्र गराउने आदेश दिएपछि आमरण अनसन तोड्नुभयो । उहाँले झोलिलो सुप पिएर अनसन तोड्नुभएको थियो,’ अनसन तोडाउन सल्लाहका लागि वीर अस्पताल पुगेका अधिवक्ता ओमप्रकास अर्यालले अन्नपूर्णसँग भने, ‘मुद्दामा उहाँसँगै बुझेर निर्णय गर्ने आदेश भएपछि सकारात्मक रुपमा लिनुपर्छ । न्यायका लागि अदालतको सहयोगी बन्नुप¥यो भनेर हामीले सुझाव पनि दियौं ।’

चितवन अदालतका प्रमुख न्यायाधीश टेकनारायण कुँबरको इजलासले यही भदौ २६ गते मुद्दामा गंगामायाको समेत वकपत्र गराउने आदेश दिएको थियो । उक्त आदेश अनुरुप गंगामायाको वकपत्र गराउन असोज २ गते चितवन अदालतका स्रेस्तेदार काठमाडौं आउँदैछन् ।

गंगाामायाले छोराको हत्याका प्रमाण दिने शर्तमा अनसन तोडेकी हुन् । ‘छोराको हत्यारालाई पक्राउ गरी न्याय पाउने आसामा सबैको आग्रह अनुरुप अहिलेलाई अनसन तोडेकी छु,’ अनसन तोड्नेक्रममा उनले भनिन् ।

विगत ६ बर्षदेख अनसन बस्दै आएकी उनी विचमा स्थगन गरी पछिल्लो समयमा पुनः ३२ दिनदेखि आमरण अनसनमै थिइन् । उनका छोरा कृष्णको २०६१ साल जेठ २४ गते चितवनमा माओवादीद्वारा हत्या भएको थियो ।

आफ्नी हजुर आमालाहत्या प्रकरणमा मुद्दा चलाइएका चार अभियुक्तमध्ये गोरखा फुजेलका छविलाल पौडेल र रुद्र आचार्य हालसम्म फरार छन् ।

तत्कालिन गोरखा जनसरकार प्रमुख रहेका पौडेलको निर्देशनमा आचार्यले गोली हानी हत्या गरेको दाबी प्रहरीको छ । आचार्य बेलायतमा लुकेर बसेकाले इन्टरपोलमार्फत झिकाउने प्रयास भइरहेको छ । पौडेलका बिषयमा भने कसैलाई जानकारी छैन ।

अन्य दुई अभियुक्त भने द्वन्द्वकालमै प्रहरीद्वारा मारिएका थिए । गंगामायाका पति नन्दप्रसाद अधिकारीको अनसनकैक्रममा दुई बर्षअघि मृत्यु भइसकेको छ । उनको अहिलेसम्म सत्गद भएको छैन । उनको लास पोष्टमार्टमपछि त्रिवि शिक्षण अस्पतालमै छ ।

सरकारका महान्यायाधिवक्ता रमनकुमार श्रेष्ठले कानुनको सासनमा कोही ठूलो नहुने बताउँदै यसको पालना गराउने कुरामा आफू प्रतिबद्ध रहेको बताए । ‘कानुनको शासन पालना गराउने महान्यायाधिवक्ताको दायित्व हो । यसमा म इमान्दारितापूर्वक भूमिका निभाउने छु,’ श्रेष्ठले भने ।