स्कुलमा बम राखिएकोप्रति अनेरास्ववियुको विरोध
काठमाडौँः राजानीका विभिन्न विद्यालयमा बम राखिएकोप्रति एमाले निकट विद्यार्थी संगठन अनेरास्ववियुले विरोध जनाएको छ । अखिलले बम राखिएकोप्रति विरोध जनाउर्दै बम राखिएको घटनाको निन्दा र भत्सना गरेको छ ।
अनेरास्ववियुका केन्द्रीय सचिव आरसी लामिछानेले अन्नपूर्णसँग भने, ‘विद्यालयमा बम राखिएको घटनाप्रति घोर निन्दा र भत्सना गर्दै यस्ता कार्यमा संलग्नलाई कारबाही गर्न माग गर्दछौँ ।’
मंगलबार बिहान राजधानीका विभिन्न नौ विद्यालयमा बम राखिएको फेला परेको छ भने दुईवटा विद्यालयमा राखिएका बम विष्फोट भएका छन्। बौद्धमा रहेको आकाशदीप बोर्डिङ स्कुल र मनकामना उमाविमा राखिएका सिलिन्डर बम विष्फोट भएको हो ।
महानगरीय प्रहरी परिसर टेकुका प्रवक्ता उपरीक्षक प्रद्युम्न कार्कीका अनुसार सानो आकारको सिलिन्डरलाई बमका रुपमा प्रयोग गरिएकोले विष्फोटबाट कुनै मानवीय क्षति भने भएको छैन। उनका अनुसार आकाशदीप स्कुल, मनकामना स्कुल, इस्टपोल एकेडेमी, एम्बेस्ड एकेडेमी, राई स्कुल, डल्लुको कञ्चनजंगा स्कुल, चप्पल कारखानामा रहेको कान्तिपुर स्कुल र बालसंसार स्कुलमा शङ्कास्पद वस्तु भेटिएको छ।
बम र शङ्कास्पद वस्तु राखिएका स्थानमा योङ कम्युनिस्ट फोर्स र अखिल नेपाल राष्ट्रिय स्वतन्त्र विद्यार्थी केन्द्र लेखिएको पर्चा भेटिएको छ।े
प्रवक्ता कार्कीका अनुसार ती दुई संस्थाले सरकारी र निजी विद्यालयको पाठ्यक्रम एउटै हुनुपर्ने, निम्न आए भएका विद्यार्थीलाई निःशुल्क पढाउनुपर्ने, निजी र सरकारी विद्यालयको मापदण्ड एउटै हुनुपर्ने लगायतका ९ बुँदे मागसहितको प्रचा छोडेका छन्। चन्दा मागेको र विद्यालयले चन्दा नदिएकाले विष्फोट गराएको हुन सक्ने प्रहरीको आशंका छ ।
प्रहरीले बम राखेको आशंकामा दुई जनालाई पक्राउ गरेको छ ।
प्रतिक्रिया दिनुहोस !
