स्टोक्सको उत्कृष्ट प्रदर्शनले इङ्ल्यान्ड विजयी 

चटगाउः अलराउन्डर बेन स्टोक्सले ब्याटिङ र बलिङ दुवैमा उत्कृष्ट प्रदर्शन गरेपछि इङ्ल्यान्डले पहिलो टेस्ट क्रिकेटमा बंगलादेशमाथि २२ रनको रोमाञ्चक जित हासिल गरेको छ । दुई सय ८६ रनको विजयलक्ष्य पछ्याएको घरेलु टोली बंगलादेश पाँचौं तथा अन्तिम दिन सोमबार आफ्नो दोस्रो पालीमा केवल दुई सय ६३ रनमा समेटिएपछि इङ्ल्यान्डको जित पक्का भएको हो । जितसँगै भ्रमणकारी टोली इङ्ल्यान्डले दुई खेलको शृंखलामा १—० को अग्रता लिएको छ ।

आठ विकेटको नोक्सानीमा दुई सय ५३ रनको स्थितिबाट अन्तिम दिनको खेल अघि बढाएको बंगलादेशले सोमबार केवल १० रन थपेर बाँकी दुई विकेट गुमायो । अन्तिम दिन केवल ३३ रनको लक्ष्यसहित ब्याटिङमा ओर्लिएको बंगलादेश ३.३ ओभरमात्र क्रिजमा टिक्न सक्यो ।

चौथो दिनको खेल समाप्त हुँदा रोमाञ्चक मोडमा रहेको पहिलो टेस्टको नतिजालाई इङ्ल्यान्डको पक्षमा पार्न सोमबार स्टोक्सले तीन बलमा दुई विकेट लिएका थिए ।

बंगलादेशका अन्तिमका दुवै ब्याट्सम्यानलाई स्टोक्सले एलबीडब्लूको धरापमा पारेका थिए । सोमबारको खेलको चौथो ओभरको पहिलो बलमा स्टोक्सले ताइजुल इस्लामलाई पेभेलियन फर्काए । त्यतिबेला ताइजुल व्यक्तिगत १६ रनमा खेल्दै थियो ।

त्यसपछि सोही ओभरको तेस्रो बलमा स्टोक्सले सफिउल इस्लामलाई पनि एलबीडब्लूकै धरापमा पारेका थिए । सफिउलले खातासम्म खोल्न पाएनन् । बंगलादेशी ब्याट्सम्यान सब्बिर रहमान भने अन्तिमसम्म ६४ रनमा अविजित रहे ।

दोस्रो पालीमा दुई विकेट लिएका स्टोक्सले पहिलो पालीमा पनि चार विकेट हात पारेका थिए । उनले पहिलो पालीमा १४ ओभर बलिङ गर्दै पाँच मेडनसहित केवल २६ रन खर्चिएका थिए ।

दोस्रो पालीमा भने उनले ११.३ ओभर बलिङ गर्दै दुई मेडनसहित २० रन खर्चिए । ब्याटिङमा पनि स्टोक्सको प्रदर्शन महत्वपूर्ण रह्यो । पहिलो पालीमा १८ रन बनाएका स्टोक्सले दोस्रो पालीमा भने ८५ रन जोडेका थिए । सोही योगदानका कारण उनी म्यान अफ दी म्याच घोषित भए ।

पहिलो टेस्टमा टस जिती ब्याटिङको निर्णय लिएको इङ्ल्यान्डले आफ्नो पहिलो पालीमा दुई सय ९३ रन बनाएको थियो । बंगलादेश भने पहिलो पालीमा दुई सय ४८ रनमा समेटिएको थियो । यसैगरी इङ्ल्यान्डले दोस्रो पालीमा दुई सय ४० रन बनाएको थियो । इङ्ल्यान्डका कप्तान एलस्टाइर कुकले जित स्वाभाविक भएको प्रतिक्रिया दिए ।

‘हामी जितप्रति विश्वस्त थियौं र नतिजा पनि त्यस्तै आयो’, खेलपछि कुकले भने । बंगलादेशका कप्तान मुसफिकर रहिमले भने जितको नजिक पुगेर पनि हार भोग्नु पर्दा दुःख लागेको बताए । शृंखलाअन्तर्गतको दोस्रो खेल आगामी शुक्रबार ढाकामा सुरु हुनेछ ।