संविधान संशोधनमा एमाले ‘तयार'

काठमाडौंः संविधान संशोधनमा ‘रिजिड' हुँदै आएको प्रमुख प्रतिपक्षी दल एमाले संविधान संशोधनका लागि तयार भएको छ ।

शुक्रबार कांग्रेस सभापति शेरबहादुर देउवा र एमाले अध्यक्ष केपी ओलीबीच सिंहदरबारमा भएको झन्डै एक घन्टा लामो छलफलपछि संशोधन गर्ने विषयमा सहमति जुटेको हो । ‘संविधान संशोधनका लागि एमाले अध्यक्षसँग घनीभूत छलफल भयो', छलफलपछि अन्नपूर्णसँग कुरा गर्दै देउवाले भने, ‘एमाले संशोधनका लागि तयार हुने भएको छ । अत्यन्त सकारात्मक छलफल भयो ।'

एमाले अध्यक्ष ओलीले पनि संविधान संशोधनबारे भएको छलफल सकारात्मक भएको प्रतिक्रिया दिए । ‘संविधान संशोधनका विषयमा चर्चा भयो । देशको हितका निम्ति आवश्यक छ भने एमाले तयार छ भन्ने मैले धारणा राखेको छु', ओलीले भने, ‘छलफल नकारात्मक भएको छैन ।'

दुई नेताबीच संविधानका विशेषगरी नागरिकता, भाषा, प्रदेश सीमांकन र राष्ट्रिय सभा गठन विषयमा छलफल गरेर संशोधन प्रस्ताव तयार गर्ने विषयमा कुराकानी केन्द्रित थियो ।

एमाले अध्यक्ष ओलीले अंगीकृतलाई प्रमुख पद दिने पक्षमा आफ्नो पार्टी नभएको तर नागरिकताका केही व्यावहारिक कठिनाइ फुकाउने गरी संशोधन गर्न तयार रहेको धारणा छलफलमा राखेका थिए । कांग्रेस सभापति देउवाले अंगीकृतलाई उच्च पद दिने भन्ने विषय आफ्नो पार्टीको औपचारिक धारणा नभएको प्रस्ट पारेका थिए ।

स्थानीय निकाय निर्वाचन गर्न मनाउने गरी राष्ट्रिय हितलाई केन्द्रमा राखेर संशोधन प्रस्ताव ल्याइए सहमति जनाउने ओलीको भनाइ ।

प्रदेश सीमांकनका विषयमा भने एमाले अझै तयार भएको छैन । स्रोतका अनुसार स्थानीय निकाय निर्वाचन गर्न मनाउने गरी राष्ट्रिय हितलाई केन्द्रमा राखेर संशोधन प्रस्ताव ल्याइए सहमति जनाउने धारणा ओलीले राखेका थिए । कांग्रेस र माओवादी केन्द्रले केही प्रदेशका केही जिल्ला र गाविस हेरफेर गर्ने गरी संशोधन प्रस्ताव गर्ने बताउँदै आएका छन् ।

मधेसी दलले माग गर्दै आएको राष्ट्रिय सभा गठनका विषयमा भने देउवाले जनसंख्या र भूगोल दुवैलाई आधार बनाउने गरी संशोधन गर्ने पक्षमा आफ्नो पार्टी रहेको धारणा राखेका थिए । यस विषयमा ओलीले पार्टीभित्र आन्तरिक छलफल गरेर मात्रै जबाफ दिनसक्ने बताएको स्रोतले जनायो ।

मधेसी मोर्चाले माग गर्दै आएको भाषाका विषयमा भने अधिकांश बोलीचालीका भाषालाई राष्ट्रिय भाषा बनाउन सकिने विषयमा देउवाले माओवादी केन्द्र र मधेसी मोर्चामा सहभागी दल पनि सहमत भएको धारणा राखेका थिए ।

त्यस विषयमा एमाले लचक देखिएको स्रोतको दाबी छ । संविधान संशोधनको सैद्धान्तिक विषयमा सहमति भए तीन प्रमुख दलबीच अनौपचारिक कार्यदल बनाएर संशोधन प्रस्ताव तयार गर्न सकिने विषयमा पनि छलफल भएको थियो ।

सत्तारूढ कांग्रेस र माओवादी केन्द्र संविधान संशोधन प्रस्ताव छिट्टै दर्ता गरेर स्थानीय निकाय चुनाव घोषणा गर्ने मनस्थितिमा छन् । यसअघि कांग्रेस–माओवादी केन्द्र र माओवादी केन्द्र–एमालेका शीर्ष नेताबीच संविधान संशोधनबारे छलफल चलेको थियो ।