ग्राहकले एक जोर सुट सिलाउन एक महिना अघिदेखि तयारी गर्नुपथ्र्यो । विवाह हुनुभन्दा निकै अगाडि सुटको अर्डर गर्नुपथ्र्यो । टेलरले एउटा सुट तयार गर्न हप्तौं समय लगाउँथ्यो । अहिले धेरै परिवर्तन आइसकेको छ । कपडा सिलाउने शैली पनि फेरिएको छ । ग्राहकले बिहान सुट अर्डर गरेर बेलुका लिन सक्छन् ।
मेरिना इम्पेक्सले दैनिक ५० सेट कोट तयार गर्न सक्छ । हामी अमेरिकन राजदूतावासदेखि नेपालका बैंक तथा कम्पनीमा कार्यरत कर्मचारीका लागि सटिङ सुटिङको काम गर्दै आएका छौं । दैनिक सयौंको संख्यामा ग्राहक आउँछन् । उनीहरूले रोजेको कपडा उनीहरुकै डिजाइनमा सिलाउनु पर्छ । हाम्रो प्राथमिकता पनि ग्राहकलाई सन्तुष्ट पार्नु हो, त्यसमा सफल भइरहेका छौं ।
मेरिना इम्पेक्स २०३९ सालमा स्थापना भएको हो । हामीले नेपालको सटिङ सुटिङ बजार राम्रोसँग चिनेका छौं । सुरुवातमा हामीले जापानबाट कपडा मगाउथ्यौं । बजारमा आयातीत कपडाको प्रभुत्व थियो ।
पाँचदेखि सातभन्दा बढी रङमा कपडा उपलब्ध थिएनन् । २०४६ सालपछि भारतीय कपडाले सटिङ सुटिङको बजार ओगट्न थाल्यो । अहिले भारतीय कपडाको हिस्सा ६० प्रतिशत छ । भारतबाट सटिङ सुटिङका सामग्री भित्रिन थालेपछि मूल्यमासमेत कमी आयो ।
अहिले ग्राहकको रोजाइ, ग्राहकले गर्ने अपेक्षामा ठूलो परिवर्तन आइसकेको छ । अहिले मानिसमा महिना दिनसम्म कुरेर सुट सिलाउने धैर्यता पनि छैन । बढी पैसा तिरेरै भए पनि एक/दुई दिनमै सिलाउन खोज्छन् ।
ग्राहकमा आएको परिवर्तनले व्यवसायीमा पनि परिवर्तन ल्याइदिएको छ । ग्राहकले भनेको समयमा कपडा तयार पार्न नसके ग्राहक भड्किने चिन्ता हुन्छ । काम हतारमा गर्दा पनि सिलाइ नराम्रो भएर ग्राहक भड्किएलान भने डर हुन्छ ।
सिलाइमा परिवर्तन
पहिला जुटको बक्रम आउँथ्यो । जुटको बक्रम राखेर कोट सिलाउन गाह्रो थियो, समय पनि लाग्थ्यो । एउटा कोट सिलाउन दुई दिन लाग्थ्यो । अहिले पेस्टिङ सिस्टम आएको छ, यसले काम सहज भएको छ । कोटको फिनिसिङ पनि राम्रो हुन्छ । पहिला जतिसुकै राम्रो कालिगढ भए पनि एउटा कोट तयार पार्न दुई दिन लाग्थ्यो । अहिले राम्रो कालीगढले एक दिनमा दुई वटासम्म कोट सिलाउन सक्छ ।
अहिले भारत, इटाली, चाइना, बैंकक, हङकङलगायतका मुलुकबाट कपडाहरु आयात गरिन्छ । चाइनाको आयात बढ्दो क्रममा छ । मूल्य कम हुनाले चिनियाँ कपडामा आकर्षण बढ्दो छ । सबैभन्दा राम्रो क्वालिटीको कपडा इटालीबाट आयात हुन्छ, मूल्य पनि चर्कै हुन्छ । इटालीको कपडाबाट कोट तयार पार्दा सामान्यता १२ हजारदेखि ६५ हजारसम्म खर्च लाग्छ । नेपालमा अहिले तीन हजारदेखि ६५ हजारसम्मका कोट सिलाइन्छ ।
रेडिमेट कपडाको असर
अहिले बजारमा रेडिमेट कपडाको बजार बढदो छ । २०५० सालदेखि रेडिमेट कपडाको बजार बढ्न थालेको हो । आयातित रेडिमेट कपडाले सटिङ सुटिङ व्यवसायलाई केही असर पक्कै गरेको छ । यतिसम्म कि सस्तो मूल्यमा कोट, जरिकोटसम्म रेडिमेट आयात हुन थालेका छन् । यसले हाम्रो व्यवसाय थप प्रभावित भएको छ ।
दोस्रो जनआन्दोलनपछि सटिङ सुटिङमा कालिगढको अभाव खड्किन थालेको छ । राम्रो काम गर्ने कालिगढ बिदेसिएका छन् । राम्रो कालिगढ पाउन छाडिसक्यो । एउटा कोट सिलाएको १३ सयभन्दा बढी पाउँछन् । राम्रो आम्दानी हुँदा पनि कालिगढ पाइँदैन ।
नेपाली कपडामा आकर्षण
पछिल्लो समय नेपाली कपडामा पनि आकर्षण देखिएको छ । स्कुल/कलेजका ड्रेस नेपाली कपडाले धानेको छ । अहिले सटिङ सुटिङमा कुल बजारको ३० प्रतिशत नेपाली कपडाले ओगटेको छ । ग्राहक धेरै प्रकारका हुन्छन् । सामान्यदेखि हाई रेन्जसम्मका फर्मल डे«सको प्रयोग हुन्छ । मानिसले विशेषगरि अफिस, विवाह तथा अन्य सुभकार्यमा फर्मल कपडा लगाउने गर्छन् ।
पछिल्लो समय ठूला कम्पनी, बैंक, अफिसमा काम गर्ने कर्मचारीले सुट लगाउन थालेका छन् । फर्मल ड्रेसमा अफिस जानुपर्ने भएकाले सिलाएका कपडा लगाउने मानिस बढेका छन् । अहिले बजार रफटप र फर्मल गरी दुई भागमा विभाजित छ । युवा बढी रफटफमा देखिन्छन् भने ३५ वर्ष माथिका मानिस फर्मलमा बढी हुन्छन् । फिटिङ र आकर्षक कपडा लगाउन चाहनेले सिलाएको कपडा नै खोज्छन् ।
बजारमा प्रतिस्पर्धा बढेको छ । व्यापारमा प्रतिस्पर्धाभन्दा पनि क्वालिटी उत्पादन र ग्राहक सर्भिसमा प्रतिस्पर्धा हुनुपर्छ । । ३४ वर्षे यात्रामा हामीले गुणस्तर र आकर्षक डिजाइनलाई प्राथामिकता दिएका छौं । त्यसैले होला ग्राहक पुनः फर्किएर आउँछन् । न्युरोडबाट सुरु भएको हाम्रो यात्रा अहिले पाटनको गाबाहल, बागबजार, सामाखुसी हुँदै विश्वज्योती महलमा आउटलेट स्थापना गरी सकिएको छ ।
हामीले आगामी दिनमा ग्राहकको सहजताका लागि डोर टू डोर सेवा गर्ने योजना बनाएका छौं । घरमै पुगेर सेवा दिन सकेको खन्डमा व्यवसाय अझै विस्तार हुने थियो । नयाँ पुस्तालाई समेट्न यो आवश्यक पनि छ ।
प्रतिक्रिया दिनुहोस !
