काठमाडौः दोस्रो रुस्लान कप क्रिकेट प्रतियोगिताको उपाधिका लागि दुई विभागीय टोली त्रिभुवन आर्मी क्लब र नेपाल पुलिस क्लबबीच भिडन्त हुने भएको छ ।
सोमबार भएको सेमिफाइनल खेलमा न्यु होराइजन क्रिकेट क्लबलाई सात विकेटले पराजित गर्दै पुलिस क्लबले फाइनलको यात्रा तय गरेको हो । आर्मी क्ल्बले भने सेमिफाइनलमा धनगढीको एसपीएलाई ७० रनले हराउँदै फाइनलमा पुलिससँगको पक्का गरेको हो । फाइनल खेल मंगलबार हुनेछ ।
कीर्तिपुरस्थित क्रिकेट मैदानमा टस हारी पहिले ब्याटिङ गरेको न्यु होराइजनले निर्धारित ओभरमा १० विकेट गुमाउँदै ८२ रनको झिनो योगफल तयार पारेको थियो । जवाफी ब्याटिङमा ओर्लिएको पुलिस क्लबले १७.४ ओभरमा केवल तीन विकेट गुमाएर लक्ष्य पार गर्यो । पुलिसको जितमा सुनिल धमलाले सर्वाधिक ३६ रनको योगदान गरे भने दीपेन्द्रसिंह ऐरीले तीन विकेट लिए । सुनिलले आफ्नो पालिमा पाँच चौका प्रहार गरेका थिए ।
यसैगरी योगेन्द्र कार्कीले १४ बलमा अविजित २० रनको योगदान गरे भने आरिफ सेखले पनि अविजित १७ रन बनाए । योगेन्द्रले एक छक्का र एक चौका प्रहार गरेका थिए । सुरुआती ब्याट्सम्यान दिलीप नाथले पनि १० रन बनाए । बलिङतर्फ दीपेन्द्रले चार ओभरमा १५ रन खर्चंदै तीन विकेट लिएका थिए । ललित भण्डारी, रामनरेश गिरी, कुशल भुर्तेल, सुनिल धमला र कप्तान मञ्जित श्रेष्ठले पनि एकएक विकेट लिए ।
न्यु होराइजनका लागि भने कृष्ण कार्कीले अविजित २५ रन बनाएका थिए । सुरुआती ब्याट्सम्यान शंकर रानाले १६ रन जोडे भने अन्य ब्याट्सम्यानले दोहोरो संख्यामा रन बनाउन सकेनन् । अतिरिक्त रूपमा १५ रन पाएको न्यु होराइजनका नौ खेलाडी दोहोरो संख्यामा रन जोड्नुअघि नै पभेलियन फर्किएका थिए ।
न्यु होराइजनका नुरध्वज सेन र प्रकाश केसी शून्य रनमै आउट भए । सुसन भारीले दुई र दुर्गेश गुप्ताले एक विकेट लिए । अर्को खेलमा टस जिती पहिले ब्याटिङ गरेको आर्मीले निर्धारित २० ओभरमा ६ विकेट गुमाउँदै एक सय ८७ रनको योगफल तयार पारेको थियो ।
जवाफी ब्याटिङमा ओर्लिएको एसपीएले निर्धारित ओभरमा सात विकेट गुमाएर एक सय १७ रनमात्र बनाउन सक्यो । आर्मी क्लबको जितमा सुरुआती ब्याट्सम्यान सागर पुनले ७५ र राजेश पुलामीले ५५ रनको योगदान गरे । सागरले ५२ बलमा एक छक्का र आठ चौका प्रहार गरे । २१ बल खेलेका राजेशले पाँच छक्का र चार चौका हिर्काए ।
सागरले ४० बलमा ५० रन पूरा गरेका थिए भने राजेशले २० बलमै अर्धशतक बनाएका थिए । आर्मी क्लबका लागि अर्का सुरुआती ब्याट्सम्यान अनिलकुमार मण्डलले ३० रनको योगदान गरे । राजु रिजालले १२ रन थपे ।
बलिङतर्फ अविनास कर्णले तीन तथा सागर पुन र जितेन्द्र मुखियाले दुईदुई विकेट लिए । एसपीएका लागि विजय रानाले सर्वाधिक ३८ र रोमन बमले २५ रन बनाएका थिए । विजयले पाँच र रोमनले चार चौका प्रहार गरे ।
प्रतिक्रिया दिनुहोस !
