मकालु जाने बाटो तत्काल खोल्न माग
काठमाडौः दैवीप्रकोप उद्धार समन्वय समितिले मकालु हिमाल जाने बाटो तत्काल निर्माण गर्न गृह मन्त्रालयसँग माग गरेको छ । मकालु हिमशृंखलामा पर्ने लाङमाले हिमताल बिहीबार दिउँसो विस्फोट हुँदा मकालु आधारशिविर जाने बाटो र पुल बगाएपछि त्यहाँ जाने बाटो बन्द भएको छ ।
मकालु हिमाल क्षेत्रको बाटो बगाएको समाचार अन्नपूर्णमा प्रकाशन भएपछि दैवीप्रकोप उद्धार समन्वय समिति संखुवासभाको सोमबार बसेको बैठकले तत्कालीन र दीर्घकालीन व्यवस्था गर्न गृह मन्त्रालयसँग माग गरेको प्रमुख जिल्ला अधिकारी शिवराज जोशीले बताउनुभयो ।
खराब मौसम र हिमपातका कारण प्रहरी त्यस क्षेत्रमा पुग्न नसकेको र तत्काल नेपाली सेनाको टोली स्थलगत अध्ययनका लागि पठाउने अन्तिम तयारी भएको उहाँले जानकारी दिनुभयो । स्थलगत अध्ययन गर्न समितिले मन्त्रालयसँग हेलिकोप्टर माग गरेको छ ।
मकालु बरुण राष्ट्रिय निकुन्जको तथ्यांकअनुसार चैतमा ५४ र वैशाखमा १९ गरी ७३ जना पर्यटक त्यस क्षेत्रमा प्रवेश गरिसकेका छन् । हेलिकोप्टर प्रयोग गरी मकालु हिमाल आरोहण र अवलोकनका लागि गएका सयभन्दा बढी पर्यटकको अवस्थाबारे कुनै जानकारी प्राप्त भएको छैन । उनीहरू फर्किए/नफर्किएको यकिन नभएकाले प्रशासनले गृह मन्त्रालयसँग तत्कालीन समाधानका लागि व्यवस्था गर्न दक्ष जनशक्ति सहितको टोली समितिले माग गरेको छ ।
स्थानीय होटेल व्यवसायीसमेत रहेका छेपाल शेर्पाले बरुण खोलाको किनारैकिनार बाटो भएकाले बाढीले याङलेखर्कदेखि लाङमालेसम्म बाटो भत्काएपछि समस्या भएको बताउनुभयो । उहाँले यउपा पिकको फेदस्थित लाङमाले हिमताल विस्फोटन भएर होटल, गोठ, पुल र चौपाया बगाउँदा करोडौं क्षति भएको समेत जानकारी दिनुभयो ।
बाढीले बरुण उपत्यकाभित्रका ज्याक खर्क, याङ्लेखर्क र तातोसोका ६ बढी गोठ र एक होटल एक दर्जन फड्के पुल, एउटा गुम्बा र मकालु बालाखर्कका रिन्जी शेर्पाको करिब दुई दर्जनभन्दा बढी याक र चौंरी बगाएको अनुमान छ ।
मकालु क्षेत्रको ठूलो हिमताल ठूलोपोखरी विस्फोटको जोखिममा रहेको अध्ययनले देखाए पनि मकालु आधारशिविरदेखि दुई घन्टा दक्षिणमा रहेको यो लाङमाले हिमतालको अवस्थाबारे कसैलाई जानकारी नभएको स्थानीयको भनाइ छ । तत्काल हिमतालको अवस्थाबारे विस्तृत जानकारी दिई सुरक्षित बनाउनसमेत मकालुका स्थानीय ग्याल्जेन शेर्पाले माग गर्नुभयो ।
पछिल्लो समय बढी हिमपात भएकाले पानीको सतह बढ्दा हिमताल फुटेको हुन सक्ने मकालु वरुण राष्ट्रिय निकुञ्जका लाकपद कुलुङले बताउनुभयो । याङमाले हिमतालबाट उत्पन्न खोला बरुण नदीमा मिसिएको छ ।
प्रतिक्रिया दिनुहोस !
