हेटौंडा : नवौं डि सिने अवार्ड २०७४ को मनोनयन सार्वजनिक गरिएको छ । छायाछवि क्रिएसनले शनिबार हेटौंडामा पत्रकार सम्मेलन गरी अवार्डमा भाग लिएका ५५ चलचित्रबाट २९ विधाका उत्कृष्ट पाँच मनोनयन सार्वजनिक गरेको हो । मनोनयनमा परेकामध्ये सर्वोत्कृष्टलाई असार २२ गते हेटौंडामा अवार्ड प्रदान गरिने आयोजक छायाछवि क्रिएसनका अध्यक्ष शान्तिप्रियले बताए ।
मनोनयन छनोटका लागि निर्देशक मोहन निरौलाको संयोजकत्वमा निर्देशक विजयरत्न तुलाधर, डब्बु क्षेत्री, सन्तोष श्रेष्ठ र सवनम मुखियासम्मिलित निर्णायक मण्डल रहेको थियो । अवार्डमा एमिनेसन, गीतकार, गायिका, गायक, संगीतकार, ध्वनि मि श्रण, पाश्र्व संगीत, केमियो, द्वन्द्व निर्देशक, बाल कलाकार, हास्यकलाकार, खलपात्र, नवनायक, नवनिर्देशक, नृत्य निर्देशक, संवाद, पटकथा, कथा, नवनायिका, चरित्रअभिनेत्री र चरित्रअभिनेता विधा समेटेको छ ।
मनोनयनमा परेका उत्कृष्ट पाँच चलचित्रमा छक्का पञ्जा, जात्रा, गाजलु, लुट-२ र पुरानो डुंगा छन् । अभिनेतामा वीर विक्रमबाट दयाहाङ राई, जात्राबाट बिपिन कार्की, पुरानो डुंगाबाट माओत्से गुरुङ, निर्भयबाट निखिल उप्रेती र लुकामारीबाट सौगतम मल्ल छन् भने अभिनेत्रीमा छक्का पञ्जाबाट प्रियंका कार्की, पुरानो डुंगाबाट मेनुका प्रधान, झुम्कीबाट रिश्मा गुरुङ, तीन घुम्तीबाट गरिमा पन्त र किस्मत-२ बाट शिल्पा पोखरेल छन् । संयोजक मणिराज गौतमले चलचित्र क्षेत्रका २९ विद्यासहित 'पब्लिक च्वाइस'मा पर्ने ४ र राष्ट्रिय चलचित्र पत्रकारिता पुरस्कारसहित ३४ विधामा अवार्ड प्रदान गरिने जानकारी दिए ।
प्रतिक्रिया दिनुहोस !
