काठमाडौं : जर्मन प्रिमियम कार निर्माता भक्सवागनको नयाँ फिचर्ससहितको टिग्वान गाडी नेपाली बजारका भित्रिएको छ । भक्सवागन गाडीको लागि नेपालको आधिकारिक बिक्रेता विशाल समूहअन्तर्गतको पूजा इन्टरनेसनल नेपाल प्रालिले होटल सोल्टीमा आयोजित एक कार्यक्रमबीच दुई मोडलका गाडी सार्वजनिक गरेको हो । कम्पनीले नयाँ टिग्वान कम्प्याक्ट एसयूभीका चार भेरियन्ट र तीन भेरियन्टका एमरोक पिकअप गाडी एकै साथ सार्वजनिक गरेको हो ।
कम्पनीले भिर्याएको नयाँ टिग्वान कारको मूल्य ९९ लाखबाट सुरु भएर भेरियन्टअनुसार एक करोड २८ लाख रुपैयाँसम्म तोकेको छ । कम्पनीले टिग्वान १.४ लिटरको बेसिक पेट्रोल अटोमेटिक १३९० सीसीको मूल्य ९९ लाख रुपैयाँ तोकेको छ । यसैगरी २.० लिटरको सेमी लोडेड पेट्रोलको अटोमेटिक १९८४ सीसी कारको मूल्य एक करोड १३ लाख र दुई लिटरको लोडेड पेट्रोल अटोमेटिक १९८४ सीसी कारको मूल्य एक करोड २८ लाख तोकेको छ ।
यसैगरी टिग्वान दुई लिटरको सेमी लोडेड डिजल अटोमेटिक १९८४ सीसी कारको मूल्य भने एक करोड १७ लाख छ ।
चारवटै भेरियन्ट कारको ग्राउन्ड क्लियरेन्स दुई सय एक एमएम छ । कम्पनीले बजारका ल्याएको नयाँ कारमा ६० लिटर इन्धन क्षमताको ट्यांकी छ । गाडीको पछाडि चार सय ७० लिटर क्षमताको लगेज स्पेस उपलब्ध छ । नयाँ गाडीका भेरियन्टअनुसार १९६० केजीदेखि २१२० केजी तौलमा उपलब्ध छ । नयाँ कारमा सिक्स स्पिड डबल क्लच ट्रान्समिसन डीएसजीदेखि सेभेन स्पिड अटोमेटिक ट्रान्समिसन गियरबक्स रहेको छ । नयाँ कारमा फोर सिलिन्डर इनलाइन इन्जिन छ । नयाँ कारको अधिकतम स्पिड प्रतिघन्टा एक सय १० देखि भेरियन्ट अनुसार दुई सय ८ किलोमिटरसम्म छ ।
गाडीमा १२ भोल्ट सकेट, अगाडि÷पछाडि डिस ब्रेकको साथमा मल्टिकोलिजन बे्रक सुविधा छ । अगाडि दुईवटा रिडिङ लाइट, आठवटा स्पिकर, सेन्टर लक, मोबाइल फोन कनेक्सन, आफ्नो इच्छाअनुसार मिलाउन सकिने सिट, फोल्डिङ ट्रंक कभरलगायत फिचर्स छन् । साथै, पार्क दुरी थाहा पाउनका लागि अगाडि पछाडि नै क्यामेरा, पार्किङ ब्रेक र दुई आवाजको हर्न रहेको छ ।
नयाँ गाडीमा पैदलयात्रीको सुरक्षा, ६ वटा एयर ब्याग, हिल स्टार्ट एसिस्ट, अटो होल्ड, आफैं बन्द हुने टायर, विद्युतीय रूपमा बनाइएका छालाका सिट, क्रुज नियन्त्रण, हेडल्याम्प स्वतः सक्रिय हुने, एप कनेक्ट, झरी र बिजुली सेन्सर, एलईडी हेडल्याम्प्स, एलईडी टेल ल्याम्प्सलगायत साँचोविहीन प्रवेश पनि यसको प्रमुख आकर्षण हो । सन् २००७ मा कम्प्याक्ट एसयूभीको रूपमा विश्व बजारमा आएको टिग्वान नेपालमा पहिलो पटक सन् २०१० मा भित्रिएको थियो । कम्पनीका अनुसार नेपालमा तीन सय ५० भन्दा बढी टिग्वान बिक्री भइसकेको छ ।
यसैगरी कम्पनीले बिहीबार नै सार्वजनिक गरेको एमरोक पिकअप तीन भेरियन्टमा सार्वजनिक गरेको छ । जसको मूल्य ८२ लाखदेखि सुरु भई ९२ लाख रुपैयाँसम्म छ । जसमा एमरोक दुई स्टार्टलाइन डिजल म्यानुयल १९६८ सीसीको ८२ लाख, ट्रेन्डलाइन डिजल म्यानुयल १९६८ सीसीको ८८ लाख र एमरोक टे«न्डलाइन लेदर सिट भएको डिजल म्यानुयल १९६८ सीसीको मूल्य ९२ लाख रुपैयाँ छ ।
यी तीन भेरियन्टका पिकअप गाडीको ग्राउन्ड क्लियरेन्स दुई सय २८ एमएम छ । गाडीमा पाँच सिट क्षमता छ । ८० लिटर इन्धन ट्यांकी रहेको पिकअपको अधिकतम् स्पिड प्रतिघन्टा एक सय ६७ किलोमिटर छ । चार सिलिन्डर इन्जिन क्षमताको पिकअप गाडीको लम्बाइ ५२ सय ५४ एमएम छ भने उचाइ १८३४ एमएम छ ।
इन्धन खपत र कार्बनडाइअक्साइड निष्कासनमा नयाँ मापदण्ड कायम गरेको छ । सार्न मिल्ने र स्थायी चार मोसनको सबै ह्विल ड्राइभ प्रणालीमा जुन सुकै रोडमा चलाउन सकिने कम्पनीले जनाएको छ ।
प्रतिक्रिया दिनुहोस !
