अस्पतालमा फार्मेसीबाट करोड आम्दानी
भरतपुर : आफ्नै फार्मेसी सञ्चालनबाट भरतपुर अस्पतालले करोड आम्दानी गरेको छ । सस्तोमै औषधि बिक्री गरे पनि भरतपुर अस्पतालले फार्मेसीबाटै यति धेरै रकम आम्दानी गरेको हो ।फार्मेसी सञ्चालनबाट अस्पतालले नौ महिनामा एक करोड ६ लाख ५० हजार रुपैयाँ आम्दानी गरेको छ । चितवनको एक मात्र सरकारी भरतपुर अस्पतालले गतवर्षदेखि आफ्नै फार्मेसी सञ्चालनमा ल्याएको हो ।
यसअघि अस्पतालले निजी फार्मेसीलाई मासिक १७ लाख रुपैयाँमा सटर भाडामा दिएको थियो । अस्पतालले नै फार्मेसी सञ्चालन गरेपछि मासिक २० लाख रुपैयाँ आम्दानी गर्न थालेको छ । साउनमा २० लाख रुपैयाँ आम्दानी भएको फार्मेसीका स्टोर प्रमुख राजकुमार ढुंगानाले उल्लेख गरे । ‘हामीलाई नाफा चाहिएको होइन, अन्यत्रभन्दा धेरै सस्तोमा औषधि बिक्री गरेका छौं', उनले भने, ‘अस्पतालले सेवामूलक काम गर्दा पनि आम्दानी बढेको छ ।' अस्पतालले गतवर्षको कात्तिक महिनाबाट आफै फार्मेसी सञ्चालन गरेको थियो । पहिलो महिनामै साढे तीन लाख रुपैयाँ आम्दानी भएको थियो ।
त्यसका लागि सरकारले १५ लाख रुपैयाँ दिएको थियो । सरकारबाट आएको रकम चलाउन नपाइने भएपछि उधारोमा औषधि किनेर फार्मेसी चलाइएको थियो । सस्तोमा औषधि बिक्री गर्दा पनि अहिले मासिक तीन लाख रुपैयाँ बढी आम्दानी भएको छ । सार्वजनिक खरिद ऐनअनुसार औषधि खरिद गरिएको छ । टेन्डरबाट औषधि खरिद गर्दा कतिपय उच्च गुणस्तरका औषधि तथा सामग्री किन्न नसकेको अस्पतालले जनाएको छ । अस्पतालको फार्मेसीमा औषधि किन्नेको भीड लाग्ने गरेको छ । अहिले फार्मेर्सीको काउन्टर थप्ने तयारी गरिएको छ ।
यसअघि बजेट अभावको कारण फरकफरक कम्पनीको औषधि राख्न समस्या थियो । आम्दानी बढेपछि चिकित्सकको सिफारिस गरेका कम्पनीको औषधि पनि राख्न थालिएको छ । ‘बजेट नहुँदा सुरुमा जटिल प्रक्रिया लाग्यो, औषधि बेचेर तिर्ने भनी उधारोमा औषधि किनेर चलायौं', अस्पतालका मेडिकल सुपरिटेन्डेन्ट डा. रुद्रप्रसाद मरासिनीले भने, ‘सरकारी नीति र जनताको सुविधाका लागि आफैंले फार्मेसी चलाएका हौं ।'
स्वास्थ्य बिमा कार्यक्रम लागू भएपछि यसलाई सहज गराउन खोजिएको हो । सरकारी स्वास्थ्य बिमा गराउनेको उपचार भरतपुर अस्पतालमा हुनेछ । उनीहरूको सुविधाका लागि पनि सस्तोमा गुणस्तरीय औषधिको सुविधा हुने अस्पताल विकास समितिका अध्यक्ष राजकुमार राजभण्डारीले बताए । ‘जनताको अस्पताल भएपछि जनतालाई सुविधा हुनुपर्छ भनेर लागेका हौं', राजभण्डारीले भने, ‘अस्पतालको हरेक सेवा विरामीमैत्री बनाएका छौ ।' फार्मेसी सञ्चालन गरेपछि १३ जनाले प्रत्यक्ष रोजगार पाएका छन् ।
अस्पतालले सेवा विशिष्टीकरण गर्दै गएको छ । पछिल्लोपटक नेपालकै ठूलो सिटी मेसिन ल्याएको छ । अस्पतालमा न्युरो सर्जरीको सेवा सुरु गरेको छ । अस्पतालबाट हुने खर्च कटौतीका लागि अस्पतालले लुगा धुने मेसिन, अक्सिजन प्लान्ट, फोहोर व्यवस्थापनलगायत काम गर्न थालेको छ ।
इन्फो
गत वर्षको कात्तिकदेखि सञ्चालन भएको फार्मेसीबाट पहिलो महिनामै साढे तीन लाख रुपैयाँ आम्दानी भएको थियो ।
प्रतिक्रिया दिनुहोस !
