ट्रम्पको फोनले सैनिक पत्नी दुःखी

वासिङटन : आतंककारी समूह इस्लासमक स्टेट (आइएस)को आक्रमणबाट मारिएका एकजना अमेरिकी सैनिककी श्रीमतीले आफूलाई अमेरिकी राष्ट्रपति डोनाल्ड ट्रम्पले गरेको टेलिफोनले झनै दुःखी बनाएको बताएकी छिन् ।

यसै महिनाको शुरुमा नाइजरमा आइएससँगको भिडन्तका क्रममा चारजना अमेरिकी सैनिक मारिएका थिए । तिनैमध्येका एकजना सार्जेन्ट ला डेभिडकी पत्नीले यस्तो बताएकी हुन् । त्यस क्रममा मारिएका ती अमेरिकी सैनिक डेभिडकी श्रीमतीले दिएको अभिव्यक्ति यतिखेर अमेरिकी मिडियामा चर्चामा आएको छ । राष्ट्रपति ट्रम्पले समवेदना व्यक्त गर्न उनलाई टेलिफोन गरेको बताइएको छ । त्यस क्रममा राष्ट्रपति ट्रम्पले आफ्नो श्रीमान्को नाम सम्झन नसकेको उनले दुःखेसो पोखेकी छिन् । उनले अमेरिकी सञ्चारलाई पनि प्रतिक्रिया दिएकी छिन् ।

उनले भनेकी छिन्, ‘मेरा श्रीमान्ले देशका लागि ज्यान गुमाउनु परेको छ र त्यो पीडा त मसँग छँदै छ । त्यसैमा पनि समवेदना दिनका लागि भन्दै मुलुकका राष्ट्रपतिले फोन गर्दा पनि देशको लागि मारिएका शहीदको नाम सम्झिन नसक्नुले मलाई थप पीडा दिएको छ ।’ डेभिडकी श्रीमतीले एक अमेरिकी टेलिभिजनसँग कुरा गर्दै सोमबार यस्तो दुःखेसो गरेकी थिइन् । उनले राष्ट्रपतिको टेलिफोनले आफूलाई झनै रुवाएको बताएकी थिइन् ।

डेभिडकी गर्भवती पत्नी मेशिया जनसनले अमेरिकी राष्ट्रपति ट्रम्पलाई आफ्ना दिवंगत पतिको नाम सम्झन कठिन अनुभव गरेको बताइन् । यस्तो थाहा पाउनुपर्दा आफूलाई झनै ठूलो चोट पुगेको भन्दै उनले आक्रोश व्यक्त गरिन् । नाइजरमा आइएस उग्रवादीहरूको हमलामा चारजना अमेरिकी सैनिक मारिएका थिए । त्यसमा परी सार्जेन्ट ला डेभिड जनसनको पनि मृत्यु भएको थियो । —रासस÷एएफपी