भ्यानको ठक्करले तीन महिने बालिकाको मृत्यु
भक्तपुर: भक्तपुरको सूर्यविनायक नपा ६ पाण्डोबजारमा मारुती भ्यानले ठक्कर दिँदा तीन महिने बालिकाको ज्यान गएको छ ।
महानगरीय प्रहरी परिसर भक्तपुरका अनुसार पाण्डोबजारबाट सुन्दरबस्तीतर्फ आउँदै गरेको बा १० च ४९२९ नम्बरको मारुती भेनले ठक्कर दिँदा घाइते भएकी तीन महिने बालिकाको उपचारको क्रममा ज्यान गएको हो ।
परिसरका प्रवक्ता प्रहरी नायब उपरीक्षक प्रसाईंले भ्यानले सुरुमा जिल्ला काभ्रे मिल्छे घर भई हाल पाण्डोबजार बस्ने ३५ वर्षीया सरोज घ्यावाकी ११ वर्षीया लक्ष्मी घ्यावालाई ठक्कर दिएको थियो । भ्यानको ठक्कर लागेकी लक्ष्मीले तीन महिनाकी बहिनी खुसी घ्यावालाई बोकेकी थिइन् ।
भ्यानको ठक्कर लागेर आँत्तिएकी लक्ष्मीको हातबाट बहिनी खुसी सडकमा खस्न पुगेकी थिइन् । हातबाट खस्न गई घाइते भएकी खुसीलाई उपचारका लागि भक्तपुर नपा ७ स्थित सिद्धि स्मृति अस्पताल लगिएकोमा उपचारकै क्रममा मृत्यु भएको प्रहरी नायब उपरीक्षक प्रसाईंले जानकारी दिए ।
घटनामा संलग्न सवारी र त्यसका चालक पाण्डोबजार नै बस्ने ३४ वर्षीय किशोरकुमार सुकुभुटु प्रहरी नियन्त्रणमा छन् । घटनाबारे थप अनुसन्धान कार्य भइरहेको परिसरले जनाएको छ ।
प्रतिक्रिया दिनुहोस !
